ചിറ്റാര് : ചിറ്റാര് വില്ലേജ് ഓഫീസില് ചെന്നാല് വില്ലേജ് ഓഫീസറെ കണികാണാന് കിട്ടില്ലെന്ന് പരാതി. ഇദ്ദേഹം ഒരിക്കലും ശരിയായ സമയത്ത് ഓഫീസില് ഉണ്ടാകില്ലെന്നും ഇതുമൂലം പൊതുജനങ്ങള്ക്ക് ലഭിക്കേണ്ട സേവനങ്ങള് യഥാസമയം ലഭിക്കുന്നില്ലെന്നും പ്രദേശവാസികള് പരാതി പറയുന്നു. വില്ലേജ് ഒഫീസര് മാത്രമല്ല ഇവിടുത്തെ പല ജീവനക്കാരും ഓഫീസില് കൃത്യമായി വരാറില്ലെന്നും നാട്ടുകാര് ആരോപിക്കുന്നു. വൈകിട്ട് അഞ്ച് മണി വരെ ഡ്യൂട്ടിയില് ഉണ്ടാകേണ്ട ഉദ്യോഗസ്ഥര് പലപ്പോഴും ഉച്ചയ്ക്ക് ശേഷം ഓഫീസ് പൂട്ടി പോകുന്നതായും പരാതി ഉയരുന്നുണ്ട്.
വയോധികര് ഉള്പ്പെടെയുള്ളവര് ദൂരെനിന്നും ഇവിടെയെത്തി മണിക്കൂറുകള് കാത്തിരുന്നാലും ഇവരുടെ ആവശ്യങ്ങള് പൂര്ത്തീകരിക്കാറില്ല. ജീവനക്കാര് ഓഫീസില് ഇല്ലെങ്കില്, ഫീല്ഡില് പോയിരിക്കുകയാണ്, ഉടനെ വരുമെന്നാണ് മറ്റുള്ളവര് പറയുക. ഇതുകേട്ട് വൈകുന്നേരം വരെ കാത്തിരിപ്പ് തുടരും. വന്നില്ലല്ലോ എന്ന് വൈകുന്നേരം അഞ്ചുമണിക്ക് ചോദിക്കുമ്പോഴാണ് ഇവര് വീട്ടില് പോയെന്നു പറയുന്നത്. വിവിധ ആവശ്യങ്ങളുമായി ബന്ധപ്പെട്ട് വില്ലേജ് ഓഫീസര് തീര്പ്പാക്കേണ്ട പതിനഞ്ചോളം ഫയലുകള് ഈ വില്ലേജ് ഓഫീസില് കെട്ടിക്കിടക്കുന്നതായാണ് വിവരം. സംഭവത്തില് പൊതുജനങ്ങള്ക്കിടയില് പ്രതിഷേധം ശക്തമാവുകയാണ്.
