കോട്ടയം : ചര്ച്ച് ആക്ട് നടപ്പില് വരുത്തണമെന്ന ആവശ്യവുമായി കേരളത്തിലെ 15 ലക്ഷം വിശ്വാസികളുള്ള ക്രിസ്ത്യന് സഭയിലെ പുരോഹിതന് നിരാഹാര സമരത്തില്. യാക്കോബായ സഭയുടെ റമ്പാനും മലങ്കര ആക്ഷന് കൗണ്സില് ഫോര് ചര്ച്ച് ആക്ട് ബില് ഇംപ്ലിമെന്റേഷന് (മക്കാബി) യുടെ സ്ഥാപക ഡയറക്ടറുമായ ബാര് യൂഹാനോന് റമ്പാനാണ് തന്റെ ആശ്രമത്തില് ഉപവാസ സമരം ആരംഭിച്ചിരിക്കുന്നത്.
ഈ മാസം 19ാം തിയതിയാണ് കൊവിഡ് മാനദണ്ഡങ്ങള് പാലിച്ചുകൊണ്ടുള്ള സമരപരിപാടികള്ക്ക് തുടക്കം കുറിച്ചിട്ടുള്ളത്. ഇന്ത്യയില് നിലവിലുള്ള ഗുരുദ്വാരാ ആക്ട് , വഖഫ് ആക്ട് എന്നിവ പോലുള്ള ഒരു നിയമം ക്രിസ്ത്യന് സഭയ്ക്കും വേണമെന്നാണ് ആവശ്യം. ക്രൈസ്തവ സഭയില് പള്ളിത്തര്ക്കം പോലുള്ള പല പ്രശ്നങ്ങള്ക്കും പിന്നില് ഇത്തരമൊരു ആക്ടിന്റെ അഭാവമാണെന്നാണ് സമരത്തെ പിന്തുണയ്ക്കുന്നവരുടെ അഭിപ്രായം.
മുന്കാലങ്ങളില് ഇത്തരമൊരു ആക്ടിനു വേണ്ടി വിവിധ ക്രൈസ്തവ സംഘടനകള് ശബ്ദമുയര്ത്തിയിട്ടുണ്ട്. ഇത്തരമൊരു നിയമം കൃഷ്ണയ്യര് അധ്യക്ഷനായി 2009 ല് തന്നെ എഴുതിത്തയ്യാറാക്കി സര്ക്കാരിലേക്ക് സമര്പ്പിക്കുകയും ചെയ്തു. എന്നാല് ഇത് നടപ്പാക്കാനോ നിയമസഭയില് അവതരിപ്പിക്കാനോ ഒരു സര്ക്കാരും തയ്യാറായിട്ടില്ല. ഇതിനുവേണ്ടിയുള്ള നിരവധി ശ്രമങ്ങള് പരാജയപ്പെട്ട സാഹചര്യത്തിലാണ് ചര്ച്ച് ആക്ട് നടപ്പാക്കിയേ തീരു എന്ന നിലപാടില് യാക്കോബായ സഭയിലെ പ്രമുഖനായ പുരോഹിതന് നേരിട്ട് സമരത്തിനിറങ്ങിയിരിക്കുന്നത്. കൊവിഡ് വ്യാപനത്തിന്റെ പശ്ചാത്തലത്തില് മൂവാറ്റുപുഴ ദയറയിലെ സ്വന്തം ആശ്രമത്തില് തന്നെയാണ് റമ്പാന് നിരാഹാര സമരം തുടങ്ങിയിട്ടുള്ളത്.
1927 ലാണ് ഇന്ത്യന് ചര്ച്ച് ആക്ട് നിലവില് വന്നത്. സ്വാതന്ത്ര്യാനന്തരം 1957 ല് എസ് സി സെതല്വാദ് അദ്ധ്യക്ഷനായ ലോ കമ്മീഷന്റെ റിപ്പോര്ട്ടില് ഇത്തരമൊരു നിയമം എല്ലാ സംസ്ഥാനങ്ങളിലും വേണമെന്ന് ആവശ്യപ്പെട്ടിരുന്നു. മഹാരാഷ്ട്ര, മദ്ധ്യപ്രദേശ്, ഗുജറാത്ത് സംസ്ഥാനങ്ങളില് ചര്ച്ച് ആക്ട് നിലവിലുണ്ട്. എന്നാല് ക്രിസ്ത്യന് സഭയുടെ സ്വത്തുവകകള് കൈകാര്യം ചെയ്യുന്നതിനുള്ള നിയമം ഇതുവരെയും കേരളത്തില് നടപ്പായിട്ടില്ല.
ഭാരതത്തിലെ സിക്കുകാര്ക്ക് ഗുരുദ്വാരാ ആക്ടുണ്ട്. മുസ്ലിംകള്ക്ക് വഖഫ് ആക്ടുണ്ട്. ഹിന്ദുക്കള്ക്ക് ഹിന്ദു റിലീജിയസ് ആന്റ് ചാരിറ്റബിള് എന്ഡോവ്മെന്റ് ആക്ടുണ്ട്. എന്നാല് ക്രിസ്ത്യാനികള്ക്ക് അവരുടെ സഭാ സ്വത്ത് കൈകാര്യം ചെയ്യാന് ഒരു നിയമവുമില്ല. ഈ വിവേചനം അവസാനിപ്പിക്കാന് നടപടി വേണമെന്ന് മക്കാബി ജനറല് സെക്രട്ടറി അഡ്വ. ബോബന് വര്ഗീസ് പറയുന്നു.
ഇന്ത്യന് ഭരണഘടന ആര്ട്ടിക്കിള് 25 അനുസരിച്ച് ഇന്ത്യയിലെ ഏതൊരു പൗരനും അവന് ഇഷ്ടമുള്ള മതത്തില് വിശ്വസിക്കാം, പ്രചരിപ്പിക്കാം, ആര്ട്ടിക്കിള് 26 അനുസരിച്ച് മതത്തിന്റെ ഉന്നമനത്തിനുവേണ്ടിയും ജീവകാരുണ്യ ലക്ഷ്യങ്ങള്ക്കും സ്ഥാപനങ്ങള് ഉണ്ടാക്കാം. എന്നാല് ആര്ട്ടിക്കിള് 26 (ഡി) പ്രകാരം ഈ സ്ഥാപനങ്ങള് ഒരു നിയമത്തിന്റെ അടിസ്ഥാനത്തിലാകണം ഭരിക്കപ്പെടേണ്ടത്. ഇത്തരമൊരു നിയമം ക്രിസ്ത്യന് സഭയില് ഇല്ല. ഈ സാഹചര്യത്തിലാണ് ദി കേരള ക്രിസ്ത്യന് ചര്ച്ച് പ്രോപ്പര്ട്ടീസ് ആന്റ് ഇന്സ്റ്റിറ്റിയൂഷന് ട്രസ്റ്റ് ബില്ല് 2009 നടപ്പാക്കണമെന്ന ആവശ്യവുമായി യാക്കോബായ സഭ രംഗത്തുവന്നിരിക്കുന്നത്.
