മാന്നാര് : ബില്ല് അടക്കാത്തതിനെ തുടര്ന്ന് വൈദ്യുതി ബന്ധം വിച്ഛേദിക്കാനെത്തിയ ലൈന്മാനെ ആക്രമിച്ച കേസില് സി.ഐ.ടി.യു പ്രാദേശിക നേതാവിനെ അറസ്റ്റ് ചെയ്തു. മാന്നാര് വൈദ്യുതി ഓഫിസിലെ ലൈന്മാന് മുഹമ്മ കാവുങ്കല് വീട്ടില് ഉത്തമനെ (56) ആക്രമിച്ച കേസില് മാന്നാര് കുരട്ടിശ്ശേരി പാവുക്കര തോലംപടവില് വീട്ടില് ടി.ജി മനോജിനെയാണ് മാന്നാര് എസ്.എച്ച്.ഒ ജി. സുരേഷ് കുമാറിന്റെ നേതൃത്വത്തില് അറസ്റ്റ് ചെയ്തത്. സി.ഐ.ടി.യു മാന്നാര് ഏരിയ ജോയന്റ് സെക്രട്ടറിയും സി.പി.എം വെസ്റ്റ് ലോക്കല് കമ്മിറ്റി അംഗവും കെ.എസ്.കെ.ടി.യു ജില്ല കമ്മിറ്റി അംഗവുമാണ് മനോജ്. എ.ഐ.ടി.യു.സി യൂനിയന് അംഗമാണ് പരിക്കേറ്റ ഉത്തമന്. ചൊവ്വാഴ്ച രാവിലെയാണ് സംഭവം. ബില് തുക അടക്കാനുള്ളതിനെ തുടര്ന്നാണ് മാന്നാര് വൈദ്യുതി ഓഫിസ് ജീവനക്കാരായ ഉത്തമന്, വിജയന്, അമര്ജിത്ത് എന്നിവര് മനോജിന്റെ വീട്ടിലെത്തിയത്.
വൈദ്യുതി ചാര്ജ് അടക്കാത്ത കാര്യം സൂചിപ്പിച്ച് മീറ്ററിനടുത്തേക്ക് പോകാന് ശ്രമിക്കുമ്പോള് മനോജ് ഓടിയെത്തി ഉത്തമന്റെ കൈപിടിച്ച് തിരിക്കുകയും മര്ദിക്കുകയും ചെയ്തതായാണ് പരാതി. ഉത്തമന്റെ കൈയിലിരുന്ന മൊബൈല് ഫോണ് വാങ്ങി ഇയാള് നിലത്തെറിയുകയും വീട്ടിനുള്ളില്നിന്ന് വെട്ടുകത്തിയെടുത്ത് എത്തിയതോടെ മൂവരും ഓടി രക്ഷപ്പെടുകയുമായിരുന്നു. പരിക്കേറ്റ ഉത്തമന് മാന്നാര് സാമൂഹിക ആരോഗ്യകേന്ദ്രത്തിലും വണ്ടാനം മെഡിക്കല് കോളജ് ആശുപത്രിയിലും ചികിത്സ തേടി. ഉത്തമന്റെ പരാതിയെ തുടര്ന്നാണ് പോലീസ് കേസെടുത്തത്. പ്രതിയെ വ്യാഴാഴ്ച കോടതിയില് ഹാജരാക്കും. വൈദ്യുതി ചാര്ജ് അടക്കാന് മൂന്ന് തവണ ഫോണില് അറിയിച്ചിട്ടും ഇതിന് കൂട്ടാക്കാതിരുന്നതിനെ തുടര്ന്നാണ് ഫ്യൂസ് ഊരാന് എത്തിയതെന്ന് വൈദ്യുതി ജീവനക്കാര് പറഞ്ഞു. സംഭവത്തില് പ്രതിഷേധിച്ച് സംയുക്ത ട്രേഡ് യൂനിയന് നേതൃത്വത്തില് മാന്നാറില് പ്രകടനവും ധര്ണയും നടത്തി.