കണ്ണൂര്: തിരുവനന്തപുരത്ത് നടന്ന എസ്എഫ്ഐ മാര്ച്ചിലെ സംഘർഷവുമായി ബന്ധപ്പെട്ട് ഒരാൾ കൂടി അറസ്റ്റിൽ. എസ്എഫ്ഐ കണ്ണൂര് ജില്ലാ സെക്രട്ടറി ജോയല് തോമസ് ആണ് അറസ്റ്റിലായത്. കഴിഞ്ഞ ആഴ്ച നടന്ന എസ്എഫ്ഐ മാർച്ചുമായി ബന്ധപ്പെട്ട് അറസ്റ്റിലാകുന്ന അഞ്ചാമത്തെ ആളാണ് ജോയൽ. മാർച്ചിനിടെ പോലീസിന് നേരെ നടന്ന അക്രത്തിന്റെ ദൃശ്യങ്ങൾ പരിശോധിച്ച ശേഷമാണ് നടപടി. കണ്ണൂരിൽ നിന്നാണ് ജോയല് തോമസിനെ പിടികൂടിയത്.
കണ്ണൂര് കൃഷ്ണമേനോന് സ്മാരക വനിതാ കോളേജിനു മുന്നില് വെച്ചാണ് ഇയാളെ അറസ്റ്റ് ചെയ്തത്. തിരുവനന്തപുരം കന്റോണ്മെന്റ് പോലീസാണ് ജോയലിനെ അറസ്റ്റ് ചെയ്തത്. ജോയലിനെ നേരെ തിരുവനന്തപുരത്തേക്ക് കൊണ്ടുപോവുകയായിരുന്നു. കണ്ണൂര് സര്വകലാശാല കോളേജ് യൂണിയന് തെരഞ്ഞെടുപ്പ് പ്രവര്ത്തനങ്ങളുമായി ബന്ധപ്പെട്ടാണ് വനിതാ കോളേജില് ജോയല് എത്തിയത്. ആ സമയമാണ് പോലീസ് അദ്ദേഹത്തെ കസ്റ്റഡിയിലെടുത്തത്. കേസില് രണ്ടാം പ്രതിയാണ് ജോയല്. കേസിൽ മുപ്പതോളം പേരെ പ്രതിചേർത്തിട്ടുണ്ട്.
