ടൊയോട്ടയുടെ ജനപ്രിയ മോഡലായ ഗ്ലാൻസയുടെ ഫെയ്സ് ലിഫ്റ്റ് ഒക്ടോബർ 14ന് വിപണിയിൽ അവതരിപ്പിക്കും. മാരുതി അവരുടെ പ്രധാനപ്പെട്ട മോഡലായ ബലേനോയുടെ ഫെയ്സ് ലിഫ്റ്റ് പുറത്തിറക്കി ഒരുമാസത്തിന് ശേഷമാണ് ബലേനോയുടെ പ്രധാന എതിരാളിയായ ഗ്ലാൻസ അവരുടെ അപ്ഡേറ്റ് പതിപ്പ് അവതരിപ്പിക്കാൻ പോകുന്നത്. 5 സ്പീഡ് മാനുവൽ, എഎംടി ഗിയർബോക്സ് ഓപ്ഷനുകളിൽ ഇത് ലഭ്യമാകും. ഇതിന് പിന്നാലെ സിഎൻജി വേരിയന്റും വിപണിയിൽ പ്രതീക്ഷിക്കുന്നുണ്ട്. ഡിസൈൻ മാറ്റങ്ങൾ പരിമിതമായിരിക്കും. പുതിയ ഗ്രില്ലും പുതുക്കിയ ഫ്രണ്ട് ബമ്പറും ഇതിൽ പ്രതീക്ഷിക്കാം.
ലെവൽ 2 അഡാസ്, വെന്റിലേറ്റഡ് ഫ്രണ്ട് സീറ്റുകൾ, വയർലെസ് ഫോൺ ചാർജർ, ടയർ പ്രഷർ മോണിറ്ററിങ് സിസ്റ്റം എന്നി ഫീച്ചറുകൾ ഗ്ലാൻസ ഫെയ്സ് ലിഫ്റ്റിലും പ്രതീക്ഷിക്കുന്നുണ്ട്. നിലവിലുള്ള 1.2 ലിറ്റർ 4 സിലിണ്ടർ പെട്രോൾ എൻജിന് പകരം 1.2 ലിറ്റർ 3- സിലിണ്ടർ ഇസഡ്12ഇ പെട്രോൾ എൻജിനാണ് ഇതിൽ പ്രതീക്ഷിക്കുന്നത്. ഈ എൻജിൻ 82 ബിഎച്ച്പി കരുത്തും 112എൻഎം ടോർക്കും ഉൽപ്പാദിപ്പിക്കാൻ ശേഷിയുള്ളതാണ്.
