തിരുവല്ല : അപ്പർ കുട്ടനാടൻ മേഖലയിലെ വെള്ളം കയറിയ വീടുകളും സ്ഥാപനങ്ങളും ശുചീകരിക്കുന്ന ജോലികൾ ആരംഭിച്ചു. മേഖലയിൽ നിന്നും വെള്ളം ഇറങ്ങിത്തുടങ്ങിയതോടെയാണ് വീടുകളും സ്ഥാപനങ്ങളും ശുചീകരിക്കുന്ന ജോലികൾ ബുധനാഴ്ച രാവിലെ മുതൽ ആരംഭിച്ചത്. പെരിങ്ങര, കടപ്ര, കല്ലുങ്കൽ, നിരണം, നെടുമ്പ്രം , തിരുമൂലപുരം എന്നിവിടങ്ങളിലെ നൂറ് കണക്കിന് വീടുകളിൽ വെള്ളം കയറിയിരുന്നു. ഈ പ്രദേശങ്ങളിലെ നിരവധി വീടുകൾക്കുള്ളിൽ ഇപ്പോഴും വെള്ളം കെട്ടി നിൽക്കുന്നുണ്ട്. മഴ മാറി വെയിൽ തെളിഞ്ഞതോടെ രണ്ട് ദിവസത്തിനകം വീടുകൾക്കുള്ളിലടക്കം കെട്ടി നിൽക്കുന്ന വെള്ളം ഒഴിയുമെന്ന പ്രതീക്ഷയിലാണ് പ്രദേശവാസികൾ.
