തിരുവനന്തപുരം : മുഖ്യമന്ത്രിയുടെ ഔദ്യോഗിക വസതിയായ ക്ലിഫ് ഹൗസിന്റെ സുരക്ഷ വര്‍ധിപ്പിക്കുന്നു. സുരക്ഷ സംബന്ധിച്ച കാര്യങ്ങള്‍ അവലോകനം ചെയ്യാന്‍ സമിതിക്ക് രൂപം നല്‍കും. സംസ്ഥാന പോലീസ് മേധാവി അനില്‍ കാന്ത് സമര്‍പ്പിച്ച റിപ്പോര്‍ട്ടിന്റെ അടിസ്ഥാനത്തിലാണ് ആഭ്യന്തരവകുപ്പ് സെക്രട്ടറിയുടെ ഉത്തരവ്. ക്ലിഫ് സുരക്ഷ അവലോകനം ചെയ്യാന്‍ ഡി.ഐ.ജിയുടെ നേതൃത്വത്തിലാണ് സമിതി രൂപവത്കരിക്കുക.
വി.ഐ.പികളുടെയും മറ്റും സുരക്ഷാകാര്യങ്ങള്‍ ഏകോപിപ്പിക്കാനായി ഒരു എസ്.പിയുടെ പ്രത്യേക തസ്തികയും സൃഷ്ടിക്കും. ദിവസങ്ങള്‍ക്ക് മുമ്പ് പ്രതിഷേധത്തിനിടെ ക്ലിഫ് ഹൗസിന് മുന്നില്‍ സുരക്ഷാ വീഴ്ചയുണ്ടായതില്‍ മുഖ്യമന്ത്രി അതൃപ്തി പ്രകടിപ്പിച്ചിരുന്നു. പോലീസിനെ വെട്ടിച്ച്‌ പ്രതിഷേധക്കാര്‍ ക്ലിഫ് ഹൗസിന്റെ ഗേറ്റ് വരെയെത്തി.
സുരക്ഷാ വീഴ്ചയില്‍ സിറ്റി പോലീസ് കമ്മീഷണറോട് അന്ന് വിശദീകരണവും തേടിയിരുന്നു. അഞ്ച് പോലീസുകാരെ സസ്പെന്‍ഡ് ചെയ്യുകയുമുണ്ടായി. ഈ സംഭവത്തിന്റെ കൂടി പശ്ചാത്തലത്തിലാണ് സുരക്ഷ വര്‍ധിപ്പിക്കാന്‍ തീരുമാനം. ഈ ഭാഗത്ത് നിരവധി മന്ത്രി വസതികളുമുണ്ട്. അതിനാല്‍ പ്രദേശം അതീവ സുരക്ഷാ മേഖലയായി പ്രഖ്യാപിക്കണമെന്ന ശുപാര്‍ശയും പരിഗണനയിലുണ്ട്.
