തളിപ്പറമ്പ് : റോഡുകളുടെ അറ്റകുറ്റപ്പണി നടത്തുന്നതിന് കുഴികള് രൂപപ്പെടുന്നത് വരെ കാത്തിരിക്കരുതെന്ന് പൊതുമരാമത്ത് വകുപ്പ് മന്ത്രി പി.എ മുഹമ്മദ് റിയാസ് പറഞ്ഞു. തദ്ദേശ സ്വയംഭരണ എക്സൈസ് വകുപ്പ് മന്ത്രി എം.വി ഗോവിന്ദന്റെ അദ്ധ്യക്ഷതയില് ചേര്ന്ന അവലോകനയോഗത്തില് സംസാരിക്കുകയായിരുന്നു മന്ത്രി. ഓരോ റോഡിനും നിര്മ്മാണ ശേഷം പരിപാലന കാലാവധിയുണ്ട്. ഈ കാലയളവില് അവയുടെ അറ്റകുറ്റപ്പണികള് പൂര്ത്തിയാക്കേണ്ട ഉത്തരവാദിത്തം കരാറുകാര്ക്കുണ്ട്.
റോഡ് പ്രവൃത്തി സംബന്ധിച്ച റിപ്പോര്ട്ടുകള് കൃത്യമായി സമര്പ്പിക്കണം. കരാറുകാരുടെയും ഉദ്യോഗസ്ഥരുടെയും ഫോണ് നമ്പര്, ടോള് ഫ്രീ നമ്പര്, പരിപാലന കാലയളവ് തുടങ്ങിയ വിവരങ്ങള് പൊതുജനങ്ങള്ക്കായി പരസ്യപ്പെടുത്തണം. മണ്ഡലത്തിലെ പുതിയ റോഡുകളുടെ സാധ്യത പരിശോധിച്ച് നടപടികള് സ്വീകരിക്കുമെന്നും മന്ത്രി അറിയിച്ചു. മണ്ഡലത്തിലെ റോഡുകളുടെ പരിപാലന കാലാവധിയും കരാറുകാരുടെ വിവരങ്ങളും ഉടന് പരസ്യപ്പെടുത്തണമെന്ന് മന്ത്രി നിര്ദ്ദേശം നല്കി.