തിരുവനന്തപുരം : എല്ലാവരും മാസ്ക് ധരിക്കണമെന്ന് മുഖ്യമന്ത്രി പിണറായി വിജയന്‍ നിര്‍ദ്ദേശിച്ചു . മാസ്ക് ധരിക്കുന്നത് രോഗാണുക്കള്‍ മറ്റുള്ളവരിലേക്ക് എത്താതിരിക്കാനുള്ള കരുതല്‍ കൂടിയാണെന്നും മുഖ്യമന്ത്രി പറഞ്ഞു. മാസ്ക് ധരിക്കുക എന്നത് ഇന്നത്തെ സാഹചര്യത്തില്‍ പൊതുവെ എല്ലാവരും സ്വീകരിക്കേണ്ട നടപടിയാണ് . ഇക്കാര്യത്തില്‍ കൃത്യമായ ബോധവല്‍ക്കരണം നമ്മുടെ സമൂഹത്തില്‍ ഉണ്ടാകേണ്ടതുണ്ട് . നമ്മുടെ ഒരു രീതി, ആശുപത്രിയ്ക്കത്തുള്ളവര്‍ മാസ്ക് ധരിക്കുക എന്നുള്ളതായിരുന്നു . ചില രാജ്യങ്ങളില്‍ വ്യാപകമായി മാസ്ക് ധരിക്കുന്നു . ഇതൊരു സംസ്കാരത്തിന്റെ ഭാഗമാണ് .
മാസ്ക് ധരിക്കുന്നത് അവരവര്‍ക്ക് രോഗം വരുന്നത് തടയാനാണ് എന്നു മാത്രം കാണേണ്ടതില്ല . മറ്റുള്ളവര്‍ക്ക് രോഗം പടരാതിരിക്കാന്‍, തന്നിലുള്ള ഏതെങ്കിലും രോഗാണുക്കള്‍ മറ്റുള്ളവരിലേക്ക് പകരാതിരിക്കാനുള്ള കരുതലിന്റെ ഭാഗം കൂടിയാണെന്നുകൂടി ഓര്‍ക്കുക . ഇപ്പോള്‍ ആരോഗ്യ രംഗത്തെ വിദഗ്ധര്‍ നിര്‍ദേശിക്കുന്നത് മാസ്ക് വ്യാപകമായി ധരിക്കണമെന്നുള്ളതാണ് . എന്നാല്‍ ഈ വിഷയത്തില്‍ സംഘര്‍ഷങ്ങള്‍ ഉണ്ടാകുന്നത് ഒഴിവാക്കണമെന്നും മുഖ്യമന്ത്രിപറഞ്ഞു.
