തിരുവനന്തപുരം : ഇലക്‌ട്രിക് ബസ് നിര്‍മാണം, സൈബര്‍ രംഗം, ഫിനാന്‍സ് എന്നീ മേഖലകളില്‍ ഹിന്ദുജ ഗ്രൂപ്പ് കേരളത്തില്‍ നിക്ഷേപം നടത്തുമെന്നു ഹിന്ദുജ ഗ്രൂപ്പ് കോ ചെയര്‍മാന്‍ ഗോപി ചന്ദ് ഹിന്ദുജ മുഖ്യമന്ത്രി പിണറായി വിജയനുമായി ലണ്ടനില്‍ നടത്തിയ കൂടിക്കാഴ്ചയില്‍ ഉറപ്പുനല്‍കി. തുടര്‍ ചര്‍ച്ചകള്‍ക്കായി ഗോപിചന്ദ് ഹിന്ദുജ ഡിസംബര്‍ അവസാനം കേരളം സന്ദര്‍ശിക്കും. അതിനു മുന്നോടിയായ ചര്‍ച്ചകള്‍ക്കായി മൂന്നംഗ ടീമിനെ ഹിന്ദുജ ചുമതലപ്പെടുത്തിയതായും മുഖ്യമന്ത്രിയുടെ ഓഫീസ് പത്രക്കുറിപ്പില്‍ അറിയിച്ചു.
അശോക് ലെയ്‌ലാന്‍ഡ് ഇലക്‌ട്രിക് വാഹന നിര്‍മാണത്തില്‍ ഇപ്പോള്‍ കേന്ദ്രീകരിക്കുന്നുണ്ട്. കേരളത്തില്‍ ഫാക്ടറി തുടങ്ങണമെന്ന മുഖ്യമന്ത്രിയുടെ അഭ്യര്‍ഥന മാനിച്ചാണു പ്രത്യേക സംഘത്തെ അയയ്ക്കാന്‍ നിശ്ചയിച്ചത്. അനുയോജ്യസ്ഥലം ഉള്‍പ്പെടെ ഈ സംഘം സന്ദര്‍ശനം നടത്തി നിര്‍ദേശിക്കും.
സൈബര്‍ ക്രൈം നേരിടുന്നതിനുള്ള ആധുനിക സംവിധാനങ്ങള്‍ ഹിന്ദുജ ഗ്രൂപ്പ് വികസിപ്പിച്ചിട്ടുണ്ട്. കേരളത്തിലെ ഐടി മാനവവിഭവശേഷി വിനിയോഗിക്കാന്‍ കഴിയുംവിധം കാമ്പസ് ആരംഭിക്കുന്ന കാര്യം പരിഗണിക്കും.
വിദ്യാഭ്യാസം, ആരോഗ്യം, ധനകാര്യം എന്നീ മേഖലകളിലും നിക്ഷേപ സാധ്യതകള്‍ പരിശോധിക്കും. മുഖ്യമന്ത്രിക്കൊപ്പം മന്ത്രി പി. രാജീവ്, നോര്‍ക്ക റൂട്ട്സ് വൈസ് ചെയര്‍മാന്‍ എം.എ. യൂസഫലി, ചീഫ് സെക്രട്ടറി ഡോ. വി.പി. ജോയ്, വ്യവസായ പ്രിന്‍സിപ്പല്‍ സെക്രട്ടറി സുമന്‍ ബില്ല എന്നിവരും ചര്‍ച്ചകളില്‍ പങ്കെടുത്തു.
