പുല്ലാട് : കോയിപ്രം പഞ്ചായത്ത് എംസിഎഫ് നവീകരിക്കുന്നു. പുതിയതായി കൺവെയർ ബെൽറ്റും ബെയിലിങ് മിഷനുമാണ് സ്ഥാപിക്കുന്നത്. പഞ്ചായത്ത് ഫണ്ടിൽനിന്ന് അഞ്ചുലക്ഷം രൂപ ചെലവഴിച്ചാണ് ബെയിലിങ് മിഷൻ വാങ്ങിയത്. കൺവെയർ ബെൽറ്റിന്റെ വിലയായ നാലരലക്ഷം രൂപയിൽ 1,25,000 രൂപ ശുചിത്വമിഷന്റെ വിഹിതമാണ്. പുതിയ ഉപകരണങ്ങൾ സ്ഥാപിക്കുന്നതിന്റെ ഭാഗമായി എംസിഎഫിന് ഉള്ളിലുള്ള മാലിന്യങ്ങൾ ക്ലീൻ കേരള കമ്പനിക്ക് കൈമാറി. ഉപകരണങ്ങൾ സ്ഥാപിച്ചതിനുശേഷം മാത്രമേ മിനി എംസിഎഫുകളിൽനിന്ന് മാലിന്യങ്ങൾ എംസിഎഫിലേക്ക് മാറ്റുകയുള്ളൂ. എട്ടടി നീളമുള്ള കൺവേയർ ബെൽറ്റാണ് സ്ഥാപിക്കുന്നത്.
ബെൽറ്റിന്റെ രണ്ടുവശങ്ങളിലായി ആളുകൾനിന്ന് പ്ലാസ്റ്റിക് കവറുകളെ മൈക്രോൺ അടിസ്ഥാനമാക്കി ഏഴായി തരംതിരിക്കും. എല്ലാ മാസവും ശരാശരി അഞ്ച് ടൺ ജൈവമാലിന്യങ്ങൾ 17 വാർഡുകളിൽ നിന്നായി ശേഖരിക്കുന്നുണ്ട്. മാലിന്യനിർമാർജനത്തിനായി 28 വനിതകൾ അടങ്ങുന്ന ഹരിതകർമസേനയാണ് പഞ്ചായത്തിനുള്ളത്. ഹരിതകർമസേനയ്ക്ക് ഉപകരണങ്ങൾ പ്രവർത്തിപ്പിക്കാനുള്ള പരിശീലനം നൽകിയതായി ചുമതലയുള്ള ഉദ്യോഗസ്ഥൻ ഇഡിക് ഷാജി പറഞ്ഞു.
