തിരുവന്തപുരം : മാനദണ്ഡങ്ങള് പാലിച്ച് കോളേജുകള് ഇന്ന് തുറക്കും. കൊറോണ വ്യാപനത്തെ തുടര്ന്ന് സംസ്ഥാനത്ത് ഏറെ നാളായി അടച്ചിട്ട കോളേജുകള് ഇന്ന് തുറക്കും. ഡിഗ്രി അവസാനഘട്ട വിദ്യര്ത്ഥികള്ക്കും പിജി വിദ്യാര്ത്ഥികള്ക്കുമാണ് ആദ്യഘട്ടത്തില് ക്ലാസുകള്. രണ്ട് ഡോസ് വാക്സിന് സ്വീകരിച്ച അദ്ധ്യാപകരേയും വിദ്യര്ത്ഥികളെയും ഉള്പ്പെടുത്തിക്കൊണ്ട് ക്ലാസ് നടത്തും. ക്യാമ്പസില് കൊറോണ മാനദണ്ഡങ്ങള് കൃത്യമായി പാലിക്കണമെന്ന് കോളേജ് അധികൃതര്ക്ക് പ്രത്യേക നിര്ദ്ദേശം നല്കിയിട്ടുണ്ട്.
പിജി ക്ലാസുകളില് വിദ്യാര്ത്ഥികളെ പൂര്ണമായും ഉള്പ്പെടുത്തിയും ഡിഗ്രി ക്ലാസുകളില് അന്പത് ശതമാനം മാത്രം വിദ്യാര്ത്ഥികളെ ഉള്പ്പെടുത്തിയുമാകും ക്ലാസുകള് നടത്തുക. ആദ്യഘട്ടത്തില് കുട്ടികളുടെ എണ്ണം അനുസരിച്ച് ഓണ്ലൈന് ഓഫ്ലൈന് ക്ലാസുകള് നടത്താനാണ് തീരുമാനം.
വിദ്യാര്ത്ഥികളും അദ്ധ്യാപകരും മറ്റ് കോളേജ് ജിവനക്കാരും എന് 95 അല്ലെങ്കില് ഡബിള് മാസ്ക് ധരിക്കണം. യാത്രകളിലും ക്യാമ്പസുകളിലും മാസ്ക് താഴ്ത്തി സംസാരിക്കാന് പാടില്ല. ഒന്നിച്ചിരുന്ന് ഭക്ഷണം കഴിക്കരുത് എന്നും നിര്ദ്ദേശമുണ്ട്. കോളേജുകളില് 18 ാം തീയതി മുതല് ക്ലാസുകളും പൂര്ണമായും ആരംഭിക്കും. മറ്റ് പരിശീലന സ്ഥാപനങ്ങളും അന്ന് തന്നെ തുറക്കും. സ്കൂളുകള് നവംബര് 4 ന് ആകും തുറക്കുക.