ന്യൂഡല്‍ഹി : കാഷ്മീര്‍ വിരുദ്ധ പരാമര്‍ശത്തില്‍ കെ.ടി. ജലീലിനെ അറസ്റ്റ് ചെയ്യണമെന്നാവശ്യപ്പെട്ട് വീണ്ടും പരാതിയുമായി അഭിഭാഷകന്‍. സുപ്രീംകോടതി അഭിഭാഷകന്‍ ജി.എസ്. മണിയാണ് ഡല്‍ഹി ഡിസിപിക്ക് പരാതി നല്‍കിയത്. ഡല്‍ഹി തിലക്മാര്‍ഗ് സ്റ്റേഷനില്‍ നേരത്തെ നല്‍കിയ പരാതിയില്‍ എഫ്‌ഐആര്‍ റജിസ്റ്റര്‍ ചെയ്തിട്ടില്ലെന്നും പരാതിയില്‍ ചൂണ്ടിക്കാട്ടിയിട്ടുണ്ട്. കാഷ്മീര്‍ യാത്രയെക്കുറിച്ച്‌ വിവരിച്ചുകൊണ്ടുള്ള ജലീലിന്റെ ഫേസ്ബുക്ക് പോസ്റ്റ് വിവാദമായതിന് പിന്നാലെയാണ് ജലീലിനെതിരെ ഡല്‍ഹിയിലെ സ്റ്റേഷനില്‍ പരാതി നല്‍കിയത്.
പാക്ക് അധീന കാഷ്മീരിനെ ആസാദി കാഷ്മീര്‍ എന്നാണ് പോസ്റ്റില്‍ വിശേഷിപ്പിച്ചിരുന്നത്. പാക്കിസ്ഥാനും പാക്ക് അനുകൂലികളുമാണ് സാധാരണ ഈ പദപ്രയോഗം നടത്താറുള്ളത്. ഇന്ത്യന്‍ അധീന കാഷ്മീര്‍ എന്ന പ്രയോഗവും ജലീലിന്റെ പോസ്റ്റിലുണ്ടായിരുന്നു. കാഷ്മീര്‍ ഇന്ത്യയുടെ ഭാഗമാണെന്ന ഇന്ത്യയുടെ പ്രഖ്യാപിത നിലപാടിനു വിരുദ്ധമാണ് ഇത്. വിഭജനകാലത്ത് കാഷ്മീര്‍ രണ്ടായി വിഭജിച്ചിരുന്നു എന്ന തെറ്റായ വിവരവും ഫേസ്ബുക്ക് കുറിപ്പിലുണ്ടായിരുന്നു.
പോസ്റ്റ് വിവാദമായതിനു പിന്നാലെ ജലീലിനെതിരെ രാജ്യദ്രോഹത്തിന് കേസെടുക്കണമെന്ന് ആവശ്യമുയര്‍ന്നിരുന്നു. ഇതേ തുടര്‍ന്ന് പോസ്റ്റിലെ വിവാദ പരാമര്‍ശങ്ങള്‍ ജലീല്‍ പിന്‍വലിച്ചിരുന്നു. ആസാദി കാശ്മീര്‍ എന്ന പ്രയോഗം ഡബിള്‍ ഇന്‍വര്‍ട്ടര്‍ഡ് കോമയിലാണ് ഇട്ടിരുന്നതെന്നും ഇതിന്റെ അര്‍ഥം മനസിലാകാത്തവരോട് സഹതാപം മാത്രമാണ് ഉള്ളതെന്നുമായിരുന്നു ജലീലിന്റെ വിശദീകരണം.
