തിരുവനന്തപുരം : തീരശോഷണം ഉള്പ്പെടെയുള്ള വിഷയങ്ങള് ഉന്നയിച്ച് വിഴിഞ്ഞത്ത് മത്സ്യത്തൊഴിലാളികള് നടത്തുന്ന സമരത്തെ രാഷ്ട്രീയവല്ക്കരിക്കാനുള്ള പ്രതിപക്ഷനേതാവ് വി.ഡി സതീശന്റെ നീക്കത്തിന് കനത്ത തിരിച്ചടി. കൂക്കിവിളിച്ചാണ് സമരക്കാര് സതീശനെ തിരിച്ചയച്ചത്. തുറമുഖ കവാടത്തിനുമുമ്പിലെ സമരവേദിയില് വ്യാഴാഴ്ച പതിനൊന്നരയോടെയാണ് വി.ഡി സതീശന് എത്തിയത്. സതീശന് പ്രസംഗിച്ചതോടെ സമരക്കാര് ബഹളംവച്ചു. രാഷ്ട്രീയക്കാര് സമരവേദിയിലേക്ക് വരേണ്ടെന്നും മത്സ്യത്തൊഴിലാളി സമരത്തെ രാഷ്ട്രീയവല്ക്കരിക്കാന് അനുവദിക്കില്ലെന്നും തൊഴിലാളികള് പറഞ്ഞു.
തുടര്ന്ന് മുദ്രാവാക്യങ്ങളും ഉയര്ന്നതോടെ സന്ദര്ശനം മതിയാക്കി സതീശന് മടങ്ങി. അരുവിക്കര ഉപതെരഞ്ഞെടുപ്പിനിടെ മുഖ്യവാഗ്ദാനമായി വിഴിഞ്ഞം പദ്ധതി അദാനി ഗ്രൂപ്പിന് നല്കിയത് അന്നത്തെ മുഖ്യമന്ത്രി ഉമ്മന്ചാണ്ടിയായിരുന്നു. പരിസ്ഥിതി, സാമൂഹ്യാഘാതപഠന വ്യവസ്ഥകള് അംഗീകരിച്ചതും കേന്ദ്രത്തിലെ കോണ്ഗ്രസ് സര്ക്കാര്. ഭരണത്തിലിരുന്നപ്പോള് തിരിഞ്ഞുനോക്കാത്തവര് ഇപ്പോള് കണ്ണീരുമായി വരുന്നത് കാപട്യമാണെന്ന് തൊഴിലാളികള് പറഞ്ഞു.
