മലയാലപ്പുഴ : മലയാലപ്പുഴ ഗ്രാമ പഞ്ചായത്ത് സ്റ്റോപ്പ് മെമ്മോ നല്കി നിര്ത്തിവെപ്പിച്ച നിര്മ്മാണ പ്രവര്ത്തനം പഞ്ചായത്ത് ഉത്തരവ് മറികടന്ന് പുനരാരംഭിച്ചതായി പരാതി. മലയാലപ്പുഴ ഗ്രാമപഞ്ചായത്തിലെ പത്താം വാര്ഡിലെ തെക്കേപ്പറമ്പില് നിരവില്പ്പടി പഞ്ചായത്ത് റോഡ് സ്വകാര്യ വ്യക്തി കരിങ്കല് മതില് കെട്ടുന്നതായാണ് പരാതി ഉയാര്ന്നിരുന്നത്. ഇത് സംബന്ധിച്ച് മലയാലപ്പുഴ നിരവില്പുത്തന്വീട്ടില് രഘുനാഥക്കുറുപ്പ് മതില് കെട്ടിയ അഭിജിത്ത് ഭവനില് വത്സലയ്ക്ക് എതിരെ മലയാലപ്പുഴ പഞ്ചായത്ത് സെക്രട്ടറിക്കും പഞ്ചായത്ത് ജില്ലാ ജോയിന്റ് ഡയറക്ടര്ക്കും പരാതി നല്കിയിരുന്നു.
ഈ പരാതിയില് കഴമ്പുണ്ടെന്ന് കണ്ടെത്തിയതിനെ തുടര്ന്ന് നിര്മ്മാണം നിര്ത്തി വെക്കാന് പഞ്ചായത്ത് ഉത്തരവിടുകയായിരുന്നു. പഞ്ചായത്തില് നിന്നും അനുമതി വാങ്ങാതെയാണ് ഇത്തരത്തില് ഒരു നിര്മ്മാണം നടക്കുന്നതെന്ന് അധികൃതര് കണ്ടെത്തിയിരുന്നു. എന്നാല് നിര്മ്മാണം നിര്ത്തിവെച്ചുകൊണ്ട് പഞ്ചായത്ത് കത്ത് നല്കിയിട്ടും ഉത്തരവ് മറികടന്നു സ്വകാര്യ വ്യക്തി വീണ്ടും നിര്മ്മാണം നടത്തുന്നതായാണ് പരാതി ഉയരുന്നത്.
