റാന്നി: റാന്നിയില് ആക്രിപെറുക്കുന്ന സംഘങ്ങള് വീടുകളിലെത്തി മോഷണം നടത്തുന്നതായി വ്യാപക പരാതി. റാന്നി പുതുശ്ശേരിമലയില് തമിഴ്നാട് സ്വദേശികളായ സ്ത്രീകള് അടങ്ങുന്ന നാലംഗ സംഘം എത്തി ആളില്ലാത്ത വീട്ടില് കയറി സാധനങ്ങള് മോഷ്ടിക്കുന്നതിനിടെ നാട്ടുകാര് കയ്യോടെ പിടികൂടി. ഇവര് സാധനങ്ങള് മോഷ്ടിക്കുന്ന ദൃശ്യങ്ങള് പ്രദേശവാസികള് മൊബൈല് ക്യാമറയില് പകര്ത്തുകയും ചെയ്തിരുന്നു. ഇതിന് സമീപത്തെ വീട്ടില് നിന്നും രണ്ട് ചാക്ക് സാധനങ്ങള് സംഘം കടത്തിയതായും പ്രദേശവാസികള് പറയുന്നു. വാഹനങ്ങളില് എത്തുന്ന സംഘം വാഹനം ഏതെങ്കിലും ആളൊഴിഞ്ഞ ഭാഗത്ത് നിര്ത്തിയിട്ട ശേഷം വീടുകളുടെ മുറ്റത്തും പരിസരത്തുമായി കിടക്കുന്ന സാധനങ്ങള് വീട്ടുകാരോട് അനുവാദം ചോദിക്കാതെ എടുത്ത് കൊണ്ട് പോകുന്നതായാണ് പരാതി ഉയരുന്നത്. പല സ്ഥലങ്ങളിലും മോഷണ ശ്രമം ആളുകള് കണ്ടതിനാല് ഇവര് കടന്നുകളയുകയായിരുന്നു.
ഇരുമ്പ് വലകളും കമ്പികളും അടക്കമുള്ള ഭാരമേറിയതും വിലയുള്ളതുമായ സാധനങ്ങളാണ് ഇവര് കൂടുതലും മോഷ്ടിക്കുന്നത്. കോന്നി താലൂക്ക് ആശുപത്രി പരിസരത്തും ഇത്തരത്തില് നടന്ന ഒരു മോഷണ ശ്രമം കയ്യോടെ പിടിച്ചിരുന്നു. ആശുപത്രിയുടെ കെട്ടിട നിര്മ്മാണം നടക്കുന്ന സമയത്ത് നിര്മ്മാണ സാമഗ്രികള് ആയിരുന്നു ഇവര് മോഷ്ടിച്ചത്. സ്ത്രീകള് ഉള്പ്പെടെയുള്ള തമിഴ്നാട് സംഘങ്ങളാണ് ഇത്തരത്തില് മോഷണം നടത്തുന്നത്. വീട്ടുകാര് പോലും അറിയാതെ സാധനങ്ങള് കടത്തുന്നതില് അതി വിദഗ്ദ്ധരാണ് പല സംഘങ്ങളും. ജില്ലയില് പലയിടത്ത് നിന്നും ഇത്തരത്തില് കടത്തികൊണ്ട് പോകുന്ന സാധനങ്ങള് ആക്രികടകളില് എത്തിയത് ശേഷം വലിയ വാഹനങ്ങളില് ഇവിടെ നിന്നും കൊണ്ട് പോവുകയും ചെയ്യുന്നു. ഇത്തരം സംഘങ്ങള് വ്യാപകമാകുമ്പോഴും ഇത് തടയുവാന് ജില്ലയില് നടപടികളില്ല.
