റാന്നി : ശബരിമല സീസണ് എത്താറായിട്ടും പെരുമ്പുഴയിലെ ശുചിമുറി സമുച്ചയം അടഞ്ഞു കിടക്കുന്നതായി പരാതി. റാന്നി ഗ്രാമ പഞ്ചായത്തിന്റെ ഉടമസ്ഥതയിലുള്ള പെരുമ്പുഴ ബസ് സ്റ്റാന്ഡിലെ ശുചി മുറി കെട്ടിടമാണ് അടഞ്ഞു കിടക്കുന്നത്. അടുത്ത സമയത്ത് കെട്ടിടം ചായം പൂശി മുഖം മിനുക്കിയെങ്കിലും ശുചി മുറി സമുച്ചയം അടഞ്ഞു കിടക്കുകയാണ്. പരിസരത്ത് ചെടികള് വെച്ചു പിടിപ്പിച്ചിരുന്നെങ്കിലും അവിടെ കാടുകള് വളര്ന്നു.
ശുചി മുറികൾ അടഞ്ഞു കിടക്കാൻ തുടങ്ങിയിട്ട് നാളേറെയായി. ടൗണിൽ എത്തുന്നവർക്ക് പ്രാഥമിക സൗകര്യങ്ങൾ നിർവ്വഹിക്കണമെങ്കിൽ ഹോട്ടലുകളെയോ ഒരു കിലോമീറ്റർ ദൂരം പോയി ഇട്ടിയപ്പാറയിലോ എത്തണം. പെരുമ്പുഴ ബസ് സ്റ്റാന്ഡിലെ വെയിറ്റിംങ്ങ് ഷെഡിനോട് ചേർന്നാണ് ശുചി മുറികൾ പണിതിരിക്കുന്നത്. എന്നാൽ ഇത് തുറന്ന് പ്രവർത്തിക്കാൻ വേണ്ട നടപടി പഞ്ചായത്ത് സ്വീകരിക്കുന്നില്ലെന്ന പരാതി സജീവമാണ്.
