കോന്നി : കോന്നി തണ്ണിത്തോട് റോഡിന് ഇരുവശവുമായി നിൽക്കുന്ന അപകടകരമായ പാഴ്മരങ്ങൾ മുറിച്ചു നീക്കി തുടങ്ങി. റാന്നി ഫോറെസ്റ്റ് ഡിവിഷനിൽ വടശേരിക്കര റേഞ്ച് പരിധിയിൽ വരുന്ന 26 പാഴ്മരങ്ങൾ ആണ് മുറിച്ചു നീക്കിതുടങ്ങിയത്. കെ എസ് ഇ ബി യുടെ സഹകരണത്തോടെ വൈദ്യുതി ലൈനുകൾ ഓഫ് ചെയ്തതിന് ശേഷം മരങ്ങൾ മുറിച്ചു മാറ്റുകയായിരുന്നു. തണ്ണിത്തോട് ഫോറെസ്റ്റേഷൻ അധികൃതർ ഉൾപ്പെടെഉള്ള ഉദ്യോഗസ്ഥരും കെ എസ് ഇ ബി ജീവനക്കാരും നേതൃത്വം നൽകി. ഉത്തരകുമരംപേരൂർ, തണ്ണിത്തോട് ഫോറെസ്റ്റെഷൻ പരിധികളിലായി 286 പാഴ്മരങ്ങൾ ആയിരുന്നു മുറിച്ചു മാറ്റുവാൻ ഉണ്ടായിരുന്നത്.
മരങ്ങൾ നിരന്തരമായി ഒടിഞ്ഞു വീഴുവാൻ തുടങ്ങിയത് വാഹന യാത്രക്കാർക്ക് ഭീഷണിയായി മാറിയതോടെ തണ്ണിത്തോട്, ഞള്ളൂർ ഉത്തരകുമരംപേരൂർ ഫോറസ്റ്റേഷൻ അധികൃതർ അപകടകരമായ മരങ്ങളുടെ പട്ടിക തയ്യാറാക്കി 286 മരങ്ങളുടെ പട്ടിക ഉന്നത ഉദ്യോഗസ്ഥർക്ക് നൽകിയിരുന്നു. എന്നാൽ ഉന്നത ഉദ്യോഗസ്ഥരുടെ നടപടികൾ വൈകിയതിനാൽ ഏറെകാലത്തിന് ശേഷമാണ് മരങ്ങൾ മുറിച്ചു മാറ്റുന്നതിനുള്ള നടപടികൾ പുരോഗമിക്കുന്നത്. ഞള്ളൂർ മുതൽ തണ്ണിത്തോട് വരെയുള്ള ഭാഗങ്ങളിൽ വട്ടമരം അടക്കമുള്ള പാഴ്മരങ്ങളും ചുവട് ദ്രവിച്ച തേക്ക് അടക്കമുള്ള മരങ്ങളും യാത്രക്കാർക്ക് ഭീഷണിയായി മാറിയിരുന്നു.
