ന്യൂഡല്ഹി: ഹത്രാസ് സംഭവത്തില് നീതി ഉറപ്പാക്കണമെന്ന് ആവശ്യപ്പെട്ട് രാജ്യവ്യാപകമായി കോണ്ഗ്രസ് നടത്തുന്ന പ്രതിഷേധത്തിന്റെ ഭാഗമായി രാജ്ഘട്ടില് സത്യഗ്രഹമിരുന്ന കോണ്ഗ്രസ് പ്രവര്ത്തകരെ പോലീസ് പുറത്താക്കി.
ഡല്ഹി പിസിസി അധ്യക്ഷന് അനില് കുമാര് ചൗധരിയേയും സംഘത്തേയുമാണ് പോലീസ് പുറത്താക്കിയത്. കോണ്ഗ്രസ് നേതാക്കള്ക്കെതിരേയുള്ള പോലീസ് അതിക്രമങ്ങളിലും സത്യഗ്രഹം നടത്തുമെന്ന് എഐസിസി ജനറല് സെക്രട്ടറി കെ.സി. വേണുഗോപാല് അറിയിച്ചിരുന്നു.
ഹത്രാസ് കേസില് ജുഡീഷല് അന്വേഷണം വേണം, മുഖ്യമന്ത്രി യോഗി ആദിത്യനാഥ് രാജിവെയ്ക്കണം, ഹത്രാസ് ജില്ലാ മജിസ്ട്രേറ്റിനെ പുറത്താക്കണം തുടങ്ങിയ ആവശ്യങ്ങളും ഉന്നയിച്ചാണ് കോണ്ഗ്രസ് പ്രതിഷേധം.