ഭോപ്പാല്: സമൂഹ വിവാഹ ചടങ്ങില് ഗര്ഭനിരോധന ഗുളികകളും കോണ്ടം പാക്കറ്റുകളും വിതരണം ചെയ്ത് അധികൃതര്. മധ്യപ്രദേശിലെ ഝബുവ ജില്ലയിലാണ് വധുവിന് നല്കിയ മേക്കപ്പ് ബോക്സിനുള്ളില് ഗര്ഭനിരോധന ഉറകള് കണ്ടെത്തിയത്. അതേസമയം ശിവരാജ് സര്ക്കാരിനെതിരെ രൂക്ഷ വിമര്ശനവുമായി കോണ്ഗ്രസ് രംഗത്തെത്തി.
സാമ്പത്തികമായി പിന്നാക്കം നില്ക്കുന്ന 296 ദമ്പതികളുടെ വിവാഹം നടത്തുകയായിരുന്നു ലക്ഷ്യം. സ്കീമിന്റെ ഭാഗമായി ദമ്പതികള്ക്ക് നല്കിയിരുന്ന മേക്കപ്പ് ബോക്സുകള്ക്കുള്ളില് നിന്നും ഗര്ഭനിരോധന ഉറകളും ഗുളികകളും കണ്ടെത്തുകയായിരുന്നു. കോണ്ടം പാക്കറ്റുകളുടെ ചിത്രങ്ങള് സോഷ്യല് മീഡിയയില് വൈറലായതോടെ സംഭവം വിവാദമായി. ഇതോടെ വിശദീകരണവുമായി അധികൃതര് രംഗത്തുവന്നു. ഗര്ഭനിരോധന ഉറകളും ഗുളികകളും വിതരണം ചെയ്തതില് തങ്ങള് ഉത്തരവാദികളല്ലെന്നും കുടുംബാസൂത്രണ ബോധവല്ക്കരണ പരിപാടിയുടെ ഭാഗമായി ആരോഗ്യവകുപ്പ് നല്കിയതാകാമെന്നും മുതിര്ന്ന ജില്ലാ ഉദ്യോഗസ്ഥനായ ഭുര്സിംഗ് റാവത്ത് പറഞ്ഞു.
