പാലക്കാട് : കെഎസ്ആര്ടിസി പ്രിയദര്ശിനി ബസില് നിന്നും വീണ് കണ്ടക്ടര്ക്ക് പരിക്ക്. ഇന്ന് രാവിലെ 9 മണിയോടെയായിരുന്നു സംഭവം. ആലത്തൂര് വാനൂര് സ്വദേശി മുഹമ്മദിനാണ് പരിക്കേറ്റത്. ഒറ്റപ്പാലത്ത് നിന്നും വടക്കഞ്ചേരി വഴി പാണ്ടാംകോടേക്ക് സര്വീസ് നടത്തുന്ന പ്രിയദർശിനി ബസിലെ കണ്ടക്ടര്ആയിരുന്നു മുഹമ്മദ്. 130ലധികം യാത്രക്കാര് അപകട സമയത്ത് ബസിലുണ്ടായിരുന്നുവെന്നാണ് വിവരം. ബസ് ആയക്കാട് മന്നത്ത് എത്തിയപ്പോള് ഡോർ തുറന്ന സമയം മുഹമ്മദ് പുറത്തേക്ക് തെറിച്ചു വീഴുകയായിരുന്നു. ബസിലെ തിരക്ക് കാരണം ആയക്കോട് സ്റ്റോപ്പില് ബസ് നിര്ത്തിയിരുന്നില്ല. ഈ സ്റ്റോപ്പില് നിന്നും ഇരുപത് അടിമാറിയാണ് മുഹമ്മദ് വീണത്. തിരക്ക് മൂലം ഉണ്ടായ അപകടമാണിതെന്നാണ് വിവരം.
പരിക്കേറ്റ മുഹമ്മദിനെ ഇരട്ടക്കുളം സ്വകാര്യ ആശുപത്രിയില് പ്രവേശിപ്പിച്ചു. അപകടമുണ്ടായ സ്ഥലത്തിന് തൊട്ടുമുന്പിലുള്ള പുളിങ്കുട്ടം ബസ്റ്റോപ്പില് ബസ് നിർത്തിയ സമയം മുന്വശത്തെ ഡോറിലൂടെ ഇറങ്ങി പുറകുവശത്ത് പോയി കണ്ടക്ടര് ഡോർ അടയ്ക്കുകയായിരുന്നുവെന്നാണ് യാത്രക്കാർ പറഞ്ഞത്. അത്രയധികം തിരക്കാണ് ബസിലുണ്ടായിരുന്നത്. തിരക്ക് കാരണം അബദ്ധത്തിൽ ഡോർ തുറന്നതാണ് കണ്ടക്ടര് അപകടത്തിൽപ്പെടാൻ ഇടയാക്കിയതെന്നാണ് പുറത്തുവരുന്ന വിവരം.
