ന്യൂഡെല്‍ഹി : രാഹുല്‍ ഗാന്ധിക്ക് പിന്നാലെ കോണ്‍ഗ്രസിന്റെ ഔദ്യോഗിക അക്കൗണ്ടും താത്കാലികമായി മരവിപ്പിച്ച്‌ ട്വിറ്റര്‍. രാഹുലിന്‍റെ ട്വീറ്റ് പങ്കുവെച്ചതിനാലാണ് കോണ്‍ഗ്രസ് അക്കൗണ്ടിനും പിടിവീണത്. സാമൂഹ മാധ്യമ ചട്ടങ്ങള്‍ ലംഘിക്കുന്നതായി കണ്ടെത്തിയതിനെ തുടര്‍ന്നാണ് നടപടിയെന്നാണ് ട്വിറ്ററിന്റെ വിശദീകരണം.
നേതാക്കള്‍ ഉള്‍പ്പെടെ അയ്യായിരം അക്കൗണ്ടുകള്‍ മരവിപ്പിച്ചതായി കോണ്‍ഗ്രസ് ആരോപിച്ചിട്ടുണ്ട്. പാര്‍ട്ടി ജന.സെക്രടറി കെ.സി വേണുഗോപാല്‍, നേതാക്കളായ രണ്‍ദീപ് സുര്‍ജേവാല, അജയ് മക്കന്‍, സുഷ്മിത ദേവ്, മാണിക്കം ടാഗോര്‍ എന്നിവരുടെ അക്കൗണ്ടിനാണ് ട്വിറ്റര്‍ പഴുതിട്ടത്. അതേസമയം എത്ര ദിവസത്തേക്കാണ് നടപടിയെന്ന് വിശദീകരിച്ചിട്ടില്ല. അഞ്ച് ദിവസമായിട്ടും രാഹുല്‍ ഗാന്ധിയുടെ അക്കൗണ്ടിനുള്ള ലോക്ക് തുടരുക തന്നെയാണ്.
