പാലക്കാട് : ത്രിവര്ണ്ണത്തില് കൈപ്പത്തിക്കു പകരം ചര്ക്കയുമായി കോണ്ഗ്രസിന് പുതിയ പതാക. തെരഞ്ഞെടുപ്പു സമയത്തൊഴികെ കോണ്ഗ്രസിന്റെ പതാകയായി ഉപയോഗിക്കുക ചര്ക്ക മുദ്രണം ചെയ്ത മൂവര്ണക്കൊടിയാകുമെന്നു കഴിഞ്ഞ ദിവസം കെപിസിസി പ്രസിഡന്റ് കെ.സുധാകരന് വ്യക്തമാക്കിയിരുന്നു. പാര്ട്ടി ചിഹ്നമായ കൈപ്പത്തി പതിപ്പിച്ച കൊടി തെരഞ്ഞെടുപ്പു സമയത്തു മാത്രമാകും ഉപയോഗിക്കുക.
സംസ്ഥാനത്തു രൂപീകരിക്കുന്ന 1,500 യൂണിറ്റ് കമ്മിറ്റികള്ക്കു വേണ്ട ഖാദി പതാകകള് നെയ്തതു കരിമ്പുഴയിലാണ്. യൂണിറ്റ് കമ്മിറ്റികളുടെ സംസ്ഥാനതല ഉദ്ഘാടനം 30നു കരിമ്പുഴയിലാണു നടക്കുന്നത്. നെയ്ത്തുഗ്രാമമായതിനാല് പതാക ഇവിടെത്തന്നെ തയ്യാറാക്കാന് കഴിയുമോയെന്നു കെപിസിസി ആരാഞ്ഞു.
സ്ത്രീകളുടെ നേതൃത്വത്തിലാണു കുങ്കുമം, വെള്ള, പച്ച തുണികള് തുന്നിച്ചേര്ത്തു കൊടികള് നിര്മ്മിച്ചത്. ചര്ക്കയുടെ ചിത്രം പ്രിന്റ് ചെയ്യുന്നതിനു പകരം വരച്ചു. കഴിഞ്ഞ ദിവസം കെപിസിസി പ്രസിഡന്റിന് ഇവ കൈമാറി. കരിമ്പുഴയിലെ തറികളില് തയ്യാറാക്കുന്ന സാരി ഉള്പ്പെടെയുള്ള വസ്ത്രങ്ങള് പ്രസിദ്ധമാണ്. ഭൂരിഭാഗം വീടുകളിലും തറികളുണ്ട്. പാലക്കാട് ജില്ലയില് ശ്രീകൃഷ്ണപുരത്തിനടുത്താണു കരിമ്പുഴ ഗ്രാമം.