പത്തനംതിട്ട : സി.പി.എം ഭരണത്തിലുള്ള മൈലപ്ര, കുമ്പഴ വടക്ക് സർവീസ് സഹകരണ ബാങ്കുകളിലെ സഹകാരികളുടെ നിക്ഷേപതുക തിരികെ ലഭ്യമാക്കുന്നതിന് അടിയന്തിര നടപടികൾ സ്വീകരിക്കണമെന്ന് മൈലപ്ര മണ്ഡലം കോൺഗ്രസ് പ്രവർത്തക യോഗം അധികൃതരോട് ആവശ്യപ്പെട്ടു. മൈലപ്ര സർവീസ് സഹകരണ ബാങ്കിൽ മുൻ സി.പി.എം ഭരണ സമിതിയുടെ കാലത്ത് നിക്ഷേപകരുടെ നൂറ് കോടിയിൽപരം രൂപ തട്ടിപ്പ് നടത്തിയത് തിരികെ പിടിച്ച് നല്കുന്നതിന് സഹകരണ വകുപ്പും പുതിയ ഭരണസമിതിയും നടപടി സ്വീകരിക്കാത്തത് അങ്ങേയറ്റം പ്രതിഷേധാർഹവും വഞ്ചനയുമാണെന്ന് കോൺഗ്രസ് പ്രവർത്തകയോഗം കുറ്റപ്പെടുത്തി.
സി.പി.എം നിയന്ത്രണത്തിലുള്ള കുമ്പഴ വടക്ക് സർവീസ് സഹകണ ബാങ്കിലും നിക്ഷേപതുക നിരികെ നല്കുന്നില്ലെന്നും ഇത് ലഭ്യമാക്കുവാന് അടിയന്തിര നടപടി സ്വീകരിക്കണമെന്നും യോഗം ആവശ്യപ്പെട്ടു. ഈ ആവശ്യങ്ങൾ ഉന്നയിച്ച് സംസ്ഥാന സഹകണ മന്ത്രിക്ക് നിവേദനം സമർപ്പിക്കുന്നതിന് പ്രവർത്തക യോഗം തീരുമാനിച്ചു. ഡി.സി.സി സംഘടനാകാര്യ ജനറൽ സെക്രട്ടറി സാമുവൽ കിഴക്കുപുറം പ്രവർത്തക യോഗം ഉദ്ഘാടനം ചെയ്തു. മണ്ഡലം പ്രസിഡന്റ് ലിബു മാത്യു അദ്ധ്യക്ഷത വഹിച്ചു. ഡി.സി.സി അംഗം ജെയിംസ് കീക്കരിക്കാട്ട്, ഗ്രാമ പഞ്ചായത്ത് പ്രസിഡന്റ് വിത്സൺ തുണ്ടിയത്ത്, ബ്ലോക്ക്, മണ്ഡലം ഭാരവാഹികളായ ക്യാപ്റ്റൻ സി.വി വർഗീസ്, ബിജു സാമുവൽ, എസ്.സുനിൽ കുമാർ, ബിന്ദു ബിനു, ജെസി വർഗീസ്, ജോബിൻ തോമസ് മൈലപ്ര, ഓമന വർഗീസ്, ജോബി മണ്ണാരക്കുളഞ്ഞി, റോസമ്മ ബേബി, മനു പി.എം, മാത്തുക്കുട്ടി വർഗീസ്, ഷാജി പെരിശ്ശേരിയൽ, ലില്ലിക്കുട്ടി, ഗോപി മേക്കഴൂർ, പ്രസാദ് പർത്തല എന്നിവർ പ്രസംഗിച്ചു.
