ഡൽഹി : കോൺഗ്രസ് അനുയായികൾ തന്നേയും തന്റെ പിതാവും മുൻ രാഷ്ട്രപതിയുമായ പ്രണബ് മുഖർജിയേയും അധിക്ഷേപിക്കുകയാണെന്നും ഇതിൽ നിന്നും അണികളെ വിലക്കണമെന്നും തനിക്ക് നീതി നൽകണമെന്നും ആവശ്യപ്പെട്ട് രാഹുൽ ഗാന്ധിക്ക് കത്തയച്ച് ശർമ്മിഷ്ഠ മുഖർജി. രണ്ട് പേജുകളിലായി എഴുതിയ ഈ കത്ത് ശർമ്മിഷ്ഠ സമൂഹമാദ്ധ്യമങ്ങളിലും പങ്കുവച്ചിട്ടുണ്ട്. ഏറ്റവും മോശമായ ഭാഷയാണ് തനിക്കും പിതാവിനുമെതിരെ കോൺഗ്രസ് അണികൾ ഉപയോഗിച്ചിരിക്കുന്നത്. സമൂഹമാദ്ധ്യമങ്ങളിലൂടെ ട്രോളിംഗിന് ഇരയായിട്ടുണ്ടെന്നും, മോശമായി അധിക്ഷേപിച്ച ചിലരെ തിരിച്ചറിഞ്ഞിട്ടുണ്ടെന്നും ശർമ്മിഷ്ഠ വ്യക്തമാക്കുന്നു.
” എന്നേയും എന്റെ പിതാവിനേയും ഏറ്റവും മോശം രീതിയിലാണ് അവർ അധിക്ഷേപിച്ചത്. അത് എന്തൊക്കെയാണെന്ന് ആവർത്തിക്കാൻ പോലും ബുദ്ധിമുട്ടുണ്ട്. പിതാവിനെതിരെ ലൈംഗികമായ പരാമർശങ്ങൾ പോലും ഇക്കൂട്ടർ നടത്തുന്നു. ഇതെല്ലാം വളരെയധികം ഞെട്ടലുണ്ടാക്കി. ജയറാം രമേശിനേയും സുപ്രിയ ശ്രീനേറ്റിനേയുമെല്ലാം ടാഗ് ചെയ്ത് ഈ വിഷയങ്ങൾ ശ്രദ്ധയിൽ പെടുത്തിയിരുന്നു, എന്നാലും ഈ കത്തുകൾക്ക് യാതൊരു പ്രതികരണമോ നടപടിയോ ഉണ്ടായിട്ടില്ലെന്നും അവർ വ്യക്തമാക്കി.
