മലപ്പുറം: കോണ്ഗ്രസ് ബ്ലോക്ക് പ്രസിഡന്റുമാരുടെ പുനസംഘടനയുമായി ബന്ധപ്പെട്ട് മലപ്പുറത്ത് ഗ്രൂപ്പ് യോഗം ചേര്ന്നു. അതൃപ്തി പരസ്യമാക്കിക്കൊണ്ടാണ് മലപ്പുറത്ത് കോണ്ഗ്രസിന്റെ ഗ്രൂപ്പ് യോഗം ചേര്ന്നത്. ആര്യാടന് ഷൗക്കത്തിന്റെ നേതൃത്വത്തില് മുഹമ്മദ് അബ്ദുറഹിമാന് സ്മാരകത്തിലാണ് യോഗം ചേര്ന്നത്. പുതിയ ബ്ലോക്ക് കമ്മിറ്റി പ്രസിഡന്റുമാരെ പ്രഖ്യാപിച്ചതിന് പിന്നാലെ കെപിസിസി നേതൃത്വത്തിനെതിരെ യോജിച്ചുള്ള നീക്കത്തിനായി എ,ഐ ഗ്രൂപ്പുകള് കൈകോര്ക്കാന് തീരുമാനിച്ചിരുന്നു.
പുനസംഘടനയില് അതിരൂക്ഷമായാണ് എ ഗ്രൂപ്പ് വികാരം ബെന്നി ബെഹന്നാന് പരസ്യമാക്കിയത്. സമവായത്തിലൂടെ പുനസംഘടനയെന്ന നിര്ദേശം നടപ്പായില്ലെന്ന് ബെന്നി ബഹനാന് തുറന്നടിച്ചു. അര്ദ്ധ രാത്രി വാട്സ് ആപ്പിലൂടെ നടത്തിയ പുനസംഘടന ജനാധിപത്യ പാര്ട്ടിക്ക് യോജിച്ചതല്ലെന്നും ബെന്നി ബഹനാന് വ്യക്തമാക്കി. ബ്ലോക്ക് പ്രസിഡന്റുമാരുടെ പുനസംഘടന കോണ്ഗ്രസില് കലാപത്തിലേക്കാണ് നീങ്ങുന്നത്.