ദില്ലി: പഞ്ചാബ് മുന് മുഖ്യമന്ത്രി ചരണ്ജിത്ത് സിംഗ് ചന്നി കോണ്ഗ്രസ് വിട്ടേക്കുമെന്ന് അഭ്യൂഹം. അദ്ദേഹം ബിജെപിയില് ചേരാന് ഒരുങ്ങുകയാണെന്ന് അഭ്യൂഹമുണ്ട്. പഞ്ചാബിലെ ചില ബിജെപി നേതാക്കളെ അദ്ദേഹം കണ്ടുവെന്നാണ് റിപ്പോര്ട്ട്. അതേസമയം കോണ്ഗ്രസ് നേതൃത്വം ചന്നിയെ ആശ്വസിപ്പിക്കാനുളള ശ്രമത്തിലാണ്. പക്ഷേ ഇതുവരെ ചന്നി വഴങ്ങിയിട്ടില്ല. കോണ്ഗ്രസില് നിരവധി അധികാരം കേന്ദ്രങ്ങള് ഉയര്ന്നുവരുന്നുവെന്ന സൂചനകള്ക്ക് പിന്നാലെയാണ് ചന്നി കൂറുമാറാന് ഒരുങ്ങുന്നത്.
നവജ്യോത് സിംഗ് സിദ്ദു പട്യാല ജയില് മോചിതനായതിന് പിന്നാലെ അധികാര കളികള് കോണ്ഗ്രസില് ശക്തമാകുമെന്ന് സൂചനയുണ്ട്. അതേസമയം പഞ്ചാബില് കോണ്ഗ്രസ് നിയമസഭാ തിരഞ്ഞെടുപ്പ് തോറ്റതിന് പിന്നാലെ രാഷ്ട്രീയ കേന്ദ്രങ്ങളില് നിന്ന് അപ്രത്യക്ഷനായിരുന്നു ചന്നി. അമരീന്ദര് സിങ്ങിനു പകരം ചരണ്ജിത് സിംഗ് ചന്നി പഞ്ചാബിന്റെ 16-ാമത് മുഖ്യമന്ത്രിയായി 2021 സെപ്റ്റംബര് 20 മുതല് 2022 മാര്ച്ച് 16 വരെ സേവനമനുഷ്ഠിച്ചു.
