കൊച്ചി : നടി ആക്രമിക്കപ്പെട്ട കേസില് സംവിധായകന് ബാലചന്ദ്രകുമാറിന്റെ വെളിപ്പെടുത്തലുകളുടെ അടിസ്ഥാനത്തില് നടന് ദിലീപിനെതിരെ പുതിയ കേസ്. അന്വേഷണ ഉദ്യോഗസ്ഥരെ അപായപ്പെടുത്താന് ഗൂഢാലോചന നടത്തിയെന്ന് ചൂണ്ടിക്കാട്ടിയാണ് ക്രൈംബ്രാഞ്ച് കേസ് രജിസ്റ്റര് ചെയ്തത്. ‘എസ്.പി കെ.എസ് സുദര്ശന്റെ കൈ വെട്ടണം’ എന്ന ദിലീപിന്റെ പരാമര്ശത്തിലാണ് കേസ്. നടി ആക്രമിക്കപ്പെട്ട കേസില് സംവിധായകന് ബാലചന്ദ്രകുമാറിന്റെ വെളിപ്പെടുത്തലുകളുടെ അടിസ്ഥാനത്തില് അന്വേഷണം ദ്രുതഗതിയിലാക്കാന് പോലീസ് തീരുമാനിച്ചിരുന്നു. ബാലചന്ദ്രകുമാര്, പ്രതികളായ പള്സര് സുനി, നടന് ദിലീപ് എന്നിവരെയും വൈകാതെ ചോദ്യം ചെയ്യും. ബാലചന്ദ്രകുമാറിന്റെ രഹസ്യമൊഴിയെടുക്കണമെന്ന അന്വേഷണസംഘത്തിന്റെ ആവശ്യം അംഗീകരിച്ച കോടതി, ഈ മാസം 12ന് ഹാജരാകാന് നോട്ടീസ് അയച്ചിരുന്നു. ആരോപണങ്ങളിലെ തെളിവുകള് ശേഖരിക്കും. ക്രൈംബ്രാഞ്ച് മേധാവി എസ്.ശ്രീജിത്തിന്റെ നേതൃത്വത്തില് പ്രത്യേക അന്വേഷണസംഘം യോഗം ചേര്ന്നാണ് തുടര്നടപടി തീരുമാനിച്ചത്.
ദിലീപിനെയും സുനിയെയും ഏതുദിവസം ചോദ്യം ചെയ്യണമെന്ന് അടക്കമുള്ള കാര്യങ്ങള് തീരുമാനിച്ചതായാണ് വിവരം. ചോദ്യാവലിയും തയാറാക്കി. അന്വേഷണം വേഗത്തില് നടക്കേണ്ടതുള്ളതിനാല് 13 അംഗ അന്വേഷണ സംഘത്തിലെ ഓരോ ഉദ്യോഗസ്ഥര്ക്കും പ്രത്യേകം ചുമതലകള് ഏല്പിച്ചിട്ടുണ്ട്. തെളിവുകളുടെ ശാസ്ത്രീയ പരിശോധനക്ക് പ്രത്യേക ഉദ്യോഗസ്ഥരെയും ചുമതലപ്പെടുത്തി. ദൃശ്യങ്ങള് എഡിറ്റ് ചെയ്ത് ശബ്ദം ഉയര്ത്തിയ സ്റ്റുഡിയോ ജീവനക്കാരെയും ചോദ്യം ചെയ്തേക്കും. വിചാരണഘട്ടം പൂര്ത്തിയാക്കാനിരിക്കെയാണ് ദിലീപിനെതിരെ ബാലചന്ദ്രകുമാര് പുതിയ വെളിപ്പെടുത്തല് നടത്തിയത്. നടി ആക്രമിക്കപ്പെടുന്ന ദൃശ്യങ്ങളുടെ പകര്പ്പ് ദിലീപിന്റെ കൈവശം ഉണ്ടെന്നാണ് വെളിപ്പെടുത്തല്. ദിലീപും പള്സര് സുനിയും തമ്മില് അടുത്ത ബന്ധമുണ്ടെന്നും ആരോപിച്ചിരുന്നു. ഇക്കാര്യങ്ങളിലൊക്കെ വ്യക്തത വരുത്തും.
ഫെബ്രുവരി 16ന് വിചാരണ പൂര്ത്തിയാക്കി വിധി പറയേണ്ടതിനാല് ഈ മാസം 20ന് അന്വേഷണസംഘം റിപ്പോര്ട്ട് സമര്പ്പിക്കണം. ക്രൈംബ്രാഞ്ച് ഐ.ജി ഫിലിപ്, എസ്.പിമാരായ കെ.എസ് സുദര്ശന്, സോജന് തുടങ്ങിയവര് കഴിഞ്ഞ ദിവസം കൊച്ചിയില് നടന്ന യോഗത്തില് പങ്കെടുത്തു. 13 ഉദ്യോഗസ്ഥരാണ് അന്വേഷണ സംഘത്തിലുള്ളത്. കഴിഞ്ഞ ദിവസം അന്വേഷണസംഘം പള്സര് സുനിയുടെ അമ്മയുടെ മൊഴി രേഖപ്പെടുത്തിയിരുന്നു. സുനി അമ്മയെ ഏല്പിച്ച കത്ത് അന്വേഷണസംഘത്തിന് കൈമാറിയിട്ടുണ്ട്. കോടതി നിര്ദേശം അനുസരിച്ച് അന്വേഷണം മുന്നോട്ട് കൊണ്ടു പോകുമെന്നാണ് യോഗത്തിനു ശേഷം എ.ഡി.ജി.പി എസ്. ശ്രീജിത്ത് മാധ്യമങ്ങളോട് പറഞ്ഞത്. അന്വേഷണം സത്യസന്ധമായി നടക്കും. എല്ലാകാര്യങ്ങളും അന്വേഷിക്കുന്നുണ്ടെന്നും വെളിപ്പെടുത്തലുകളെല്ലാം അന്വേഷണപരിധിയിലുണ്ടെന്നും അദ്ദേഹം കൂട്ടിച്ചേര്ത്തു.
