തിരുവനന്തപുരം: ഓണസദ്യ മാലിന്യത്തൊട്ടിയിലേക്ക് വലിച്ചെറിഞ്ഞ് പ്രതിഷേധിച്ച ശുചീകരണ തൊഴിലാളികള്ക്കെതിരായ നടപടി തിരുവനന്തപുരം കോര്പ്പറേഷന് പിന്വലിച്ചേക്കും.കഴിഞ്ഞ ശനിയാഴ്ചയാണ് തിരുവനന്തപുരം കോര്പ്പറേഷനിലെ ചാല സര്ക്കിളിലുള്ള ശുചീകരണ തൊഴിലാളികള് ഓണസദ്യ മാലിന്യക്കുപ്പയില് തള്ളിയത്. ഷിഫ്റ്റ് തീര്ന്നിട്ടും പണി ചെയ്യാന് നിര്ബന്ധിച്ചുവെന്ന് ആരോപിച്ചായിരുന്നു ഭക്ഷണം മാലിന്യത്തില് തള്ളിയത്.
തൊഴിലാളികളെ പിരിച്ചുവിട്ട നടപടിക്കെതിരെ സിപിഎമ്മിനുള്ളില് തന്നെ പ്രതിഷേധം ശക്തമായ സാഹചര്യത്തിലാണ് നടപടി തിരുത്താന് ഒരുങ്ങുന്നത്. നടപടി പിന്വലിക്കണമെന്ന് സിപിഎം, മേയര് ആര്യാ രാജേന്ദ്രന് നിര്ദ്ദേശം നല്കിയതായാണ് വിവരം. തൊഴിലാളികള്ക്കെതിരായ നടപടി പിന്വലിക്കണമെന്ന് സിഐടിയുവും ഐഎന്ടിയുസിയും ആവശ്യപ്പെട്ടിരുന്നു. സി.ഐ.ടി.യുവില് പെട്ടവരാണ് നടപടി നേരിട്ടവരില് ഭൂരിഭാഗവും.
ഹെല്ത്ത് ഇന്സ്പെക്ടറുടേയും ഹെല്ത്ത് സൂപ്പര്വൈസറുടേയും റിപ്പോര്ട്ടിന്റെ അടിസ്ഥാനത്തില് ഏഴ് സ്ഥിരം തൊഴിലാളികളെയാണ് മേയര് ആര്യാ രാജേന്ദ്രന് സസ്പെന്ഡ് ചെയ്തത്. നാല് താത്കാലിക ജീവനക്കാരെ പിരിച്ചുവിടുകയും ചെയ്തു. ഭക്ഷണം വലിച്ചെറിഞ്ഞതിനെതിരെ രൂക്ഷമായ ഭാഷയില് മേയര് വിമര്ശിക്കുകയും ചെയ്തിരുന്നു. എന്നാല് മേയറുടെ നടപടിയെ സി.പി.എം സംസ്ഥാന സെക്രട്ടറി എം.വി.ഗോവിന്ദന് തള്ളിപ്പറഞ്ഞിരുന്നു. പ്രതിഷേധിക്കുന്നവരെ പിരിച്ചുവിടുന്നത് പാര്ട്ടി നയമല്ലെന്നായിരുന്നു എം.വി.ഗോവിന്ദന്റെ നിലപാട്.
