നാഗര്കോവില് : കന്യാകുമാരി കളിയിക്കാവിളയില് മകന് മരിച്ച സങ്കടത്താല് അച്ഛനും അമ്മയും കത്തെഴുതി വെച്ചിട്ട് തൂങ്ങി മരിച്ചു. കളിയിക്കാവിള മേതുക്കുമല് തിട്ടന്കനവിള സ്വദേശി സഹായം (60), ഭാര്യ സുഗന്ധി (55) എന്നിവരാണ് ജീവനൊടുക്കിയത്. ഇന്നലെ ആയിരുന്നു സംഭവം. സഹായം – സുഗന്ധി ദമ്പതികളുടെ മകന് ഡീ ബ്രോഗ്ലി ഒരു വര്ഷംമുമ്പ് ബാംഗ്ലൂരില് വാഹനാപകടത്തില് മരിച്ചിരുന്നു. രണ്ട് ദിവസംമുമ്പ് മകന്റെ ഒന്നാം ചരമ വാര്ഷികത്തിനുശേഷം ദമ്പതികള് മനംനൊന്തനിലയില് കാണപ്പെട്ടിരുന്നു.
ഇന്നലെ രാവിലെ 9 മണിയായിട്ടും വീടിന്റെ വാതില് തുറക്കാത്തതിനാല് അയല്വാസികള് കളിയിക്കാവിള പോലീസിനെ വിവരം അറിയിക്കുകയായിരുന്നു. പോലീസ് വാതില് തള്ളിത്തുറന്ന് നോക്കിയപ്പോള് ഹാളില് രണ്ടുപേരും തൂങ്ങി മരിച്ച നിലയില് കാണപ്പെട്ടു. പരിശോധനയില് ആത്മഹത്യക്കുറിപ്പ് ലഭിച്ചിരുന്നു. മകന് മരിച്ച വേദന സഹിക്കാന് പറ്റാത്തതിനാല് ആത്മഹത്യ ചെയ്യുന്നുവെന്ന് കത്തില് കുറിച്ചിരുന്നതായി പോലീസ് പറഞ്ഞു.
