കൊച്ചി : നടിയെ ആക്രമിച്ച കേസില് സംവിധായകന് ബാലചന്ദ്ര കുമാറിന്റെ രഹസ്യ മൊഴിയെടുക്കാന് എറണാകുളം സി ജെ എം കോടതി അനുമതി നല്കി. രഹസ്യ മൊഴി രേഖപ്പെടുത്താന് മജിസ്ട്രേറ്റിനെ ചുമതലപ്പെടുത്തും.
നടിയെ ആക്രമിച്ച കേസിലെ മുഖ്യ പ്രതി സുനില് കുമാറുമായി പ്രതി ദിലീപിന് ബന്ധമുണ്ടെന്നും നടിയുടെ അപകീര്ത്തികരമായ ദൃശ്യങ്ങള് ദിലീപിന്റെ കൈവശമുണ്ടെന്നും സംവിധായകന് ബാലചന്ദ്ര കുമാര് വെളിപ്പെടുത്തിയിരുന്നു.
ഈ സാഹചര്യത്തിലാണ് രഹസ്യ മൊഴി രേഖപ്പെടുത്തുന്നത്. കേസില് വിചാരണ നീട്ടണമെന്ന് സര്ക്കാര് സുപ്രിംകോടതിയെ അറിയിച്ചിരുന്നു. വിചാരണയ്ക്ക് ആറ് മാസം കൂടി സമയം അനുവദിക്കണമെന്ന് സര്ക്കാര് സുപ്രീംകോടതിയെ അറിയിച്ചു. ഫെബ്രുവരി 16 വരെയാണ് വിചാരണയ്ക്ക് സമയം അനുവദിച്ചിരുന്നത്. എന്നാല് നിര്ണായകമായ പുതിയ വെളിപ്പെടുത്തലുകള് വന്ന സാഹചര്യത്തില് വിചാരണ നീട്ടണമെന്നാണ് സര്ക്കാരിന്റെ ആവശ്യം
