ന്യൂഡല്ഹി : മീ ടൂ ആരോപണം ഉന്നയിച്ച മാദ്ധ്യമ പ്രവര്ത്തക പ്രിയ രമണിക്കെതിരെ മുന് വിദേശകാര്യ സഹമന്ത്രി എം ജെ അക്ബര് നല്കിയ മാനനഷ്ടകേസ് കോടതി തളളി. പരാതി ഉന്നയിക്കാന് വര്ഷങ്ങള്ക്ക് ശേഷവും സ്ത്രീകള്ക്ക് അവകാശമുണ്ടെന്ന് നിരീക്ഷിച്ച കോടതി ക്രിമിനല് മാനനഷ്ടം നിലനില്ക്കില്ലെന്നും നിരീക്ഷിച്ചു. ഡല്ഹി കട്കട്ദുമ കോടതിയില് പരിഗണിച്ച കേസില് അഡീഷണല് ചീഫ് മെട്രോപൊളിറ്റന് മജിസ്ട്രേറ്റ് രവീന്ദ്ര കുമാറാണ് വിധി പ്രസ്താവിച്ചത്.
ഇന്ത്യയിലെ സ്ത്രീകള്ക്ക് ആവശ്യം തുല്യതയാണ്. സ്ത്രീകളുടെ അന്തസിന് ഒരാളുടെ കീര്ത്തിയെക്കാള് വിലയുണ്ട്. സീതയെ രക്ഷിക്കാന് ജഡായു എത്തിയത് ഓര്ക്കണമെന്നും കോടതി പറഞ്ഞു. 1990കള് മുതല് മാദ്ധ്യമരംഗത്തുളള പ്രിയാ രമാണി 1994ല് ജോലിക്കായുളള ഒരു ഇന്റര്വ്യൂവിന് മുംബയിലെ ഹോട്ടല്മുറിയില് എത്തിയപ്പോള് തനിക്ക് അക്ബറില് നിന്ന് മോശം അനുഭവം നേരിട്ടെന്നാണ് 2018ല് വെളിപ്പെടുത്തിയത്. പിന്നാലെ ഇരുപതോളം സ്ത്രീകളും എം ജെ അക്ബറിനെതിരെ ആരോപണം ഉന്നയിച്ച് രംഗത്തെത്തുകയായിരുന്നു.
വെളിപ്പെടുത്തലുകള് വിവാദമായതോടെ എം ജെ അക്ബറിന് മന്ത്രിസ്ഥാനം രാജിവയ്ക്കേണ്ടി വന്നു. പിന്നാലെയാണ് പ്രിയ രമാണിയുടെ ആരോപണം അടിസ്ഥാന രഹിതമാണെന്നും തനിക്ക് മാനഹാനിയുണ്ടാക്കിയെന്നും ചൂണ്ടിക്കാട്ടി എം ജെ അക്ബര് കോടതിയെ സമീപിച്ചത്.