ന്യൂഡല്‍ഹി : കോവാക്സിന്‍റെ മൂന്നാം ഘട്ട മനുഷ്യ പരീക്ഷണത്തിന് ഇന്ന് തുടക്കം. ഹരിയാന മന്ത്രി അനിൽ വിജാണ് ആദ്യ ഡോസ് സ്വീകരിക്കുക. അടുത്ത വർഷം 30 കോടി ആളുകൾക്ക് വാക്സിൻ ലഭ്യമാക്കുമെന്ന് ആരോഗ്യമന്ത്രി ഹർഷവർധന് പറഞ്ഞു. രാജ്യത്ത് നിലവിൽ കോവിഡ് സ്ഥിരീകരിച്ചവരുടെ എണ്ണം 90 ലക്ഷത്തോടടുത്തു.
ഭാരത് ബയോടെക് നിർമ്മിച്ച കോവാക്സീന്‍റെ മൂന്നാംഘട്ട മനുഷ്യപരീക്ഷണത്തിന് ഹരിയാനയിലാണ് തുടക്കമിടുന്നത്. 25 കേന്ദ്രങ്ങളിലായി 25000 പേർ മൂന്നാം ഘട്ട പരീക്ഷണത്തിന്‍റെ ഭാഗമാകും. ഹരിയാന മന്ത്രി അനില്‍ വിജാണ് ആദ്യ ഡോസ് സ്വീകരിക്കുക. നാല് മാസത്തിനകം രാജ്യത്ത് വാക്സിന്‍ തയ്യാറാകുമെന്ന് ഉറപ്പുണ്ടെന്നാണ് ആരോഗ്യമന്ത്രി ഹർഷ വർധന്‍ വെബിനാറില്‍ പറഞ്ഞത്. അടുത്ത വർഷം 30 കോടി ആളുകള്‍ക്ക് 500 മില്യണ്‍ ഡോസ് വാക്സിന്‍ ലഭ്യമാക്കും. ആദ്യം ആരോഗ്യ പ്രവർത്തകർക്കും ശേഷം പ്രായമായവർക്കും നല്കുമെന്നും ഹർഷവർധന് കൂട്ടിച്ചേർത്തു.
