വാഷിങ്ടണ് : ഭാരത് ബയോടെക്ക് നിര്മ്മിക്കുന്ന കോവിഡ് വാക്സിനായ കോവാക്സിന് ലോകാരോഗ്യ സംഘടനയുടെ അനുമതി ലഭിക്കാന് വൈകുമെന്ന് സൂചന. ലോകാരോഗ്യ സംഘടനയുടെ പ്രതിരോധ കുത്തുവെപ്പുകളുമായി ബന്ധപ്പെട്ട വിദഗ്ധസമിതിയുടെ യോഗം ഒക്ടോബര് അഞ്ചിനാണ് നടക്കുക. ഇതിന് ശേഷമായിരിക്കും ഇക്കാര്യത്തില് അന്തിമ തീരുമാനമെടുക്കുക. ഫൈസര്-ബയോടെക്, ജോണ്സണ് & ജോണ്സണ്, മൊഡേണ, സിനോഫാം, ഓക്സ്ഫെഡ്-ആസ്ട്ര സെനിക്ക തുടങ്ങിയ വാക്സിനുകള്ക്കാണ് ലോകാരോഗ്യ സംഘടന അടിയന്തര ഉപയോഗത്തിന് അനുമതി നല്കിയത്.
ഇന്ത്യയില് അടിയന്തര ഉപയോഗത്തിന് അനുമതി ലഭിച്ച വാക്സിനുകളിലൊന്നാണ് കോവാക്സിന്. ഓക്സ്ഫെഡ്-ആസ്ട്രസെനിക്കയുടെ കോവിഷീല്ഡിനൊപ്പം കോവാക്സിനും രാജ്യത്ത് വ്യാപകമായി ഉപയോഗിക്കുന്നുണ്ട്. ജൂലൈ ഒമ്പതിന് തന്നെ കോവാക്സിന് ലോകാരോഗ്യ സംഘടനയുടെ അനുമതിക്കായി അപേക്ഷ നല്കിയിരുന്നുവെന്നും ഈ അപേക്ഷ പരിഗണനയിലാണെന്നുമാണ് ഇതുമായി ബന്ധപ്പെട്ട ചോദ്യത്തിന് കേന്ദ്രസര്ക്കാര് രാജ്യസഭയില് മറുപടി നല്കിയത്. കോവാക്സിന് ലോകാരോഗ്യ സംഘടനയുടെ അനുമതി ലഭിക്കാത്തത് മൂലം പല രാജ്യങ്ങളും വാക്സിനെ അംഗീകരിച്ചിട്ടില്ല. ഇതുമൂലം ഇന്ത്യയില് നിന്നും വിവിധ രാജ്യങ്ങളിലേക്ക് പോവുന്ന പ്രവാസികള് ഉള്പ്പടെ ദുരിതത്തിലാണ്.