തിരുവനന്തപുരം: കോവിഡ് വൈറസ് വ്യാപനത്തിന്റെ രണ്ടാംതരംഗം റിപ്പോര്ട്ട് ചെയ്യപ്പെട്ടതോടെ വീണ്ടും ലോക്ക് ഡൗണ് ഉണ്ടാകുമോ എന്ന സംശയത്തിലാണ് ജനങ്ങള്. സംസ്ഥാനത്ത് സമ്പൂര്ണ അടച്ചുപൂട്ടല് ഉണ്ടാകില്ലെങ്കിലും കര്ശനമായ നിയന്ത്രണങ്ങള് നടപ്പിലാക്കും എന്ന കാര്യത്തില് സംശയമില്ല. ഇത് സംബന്ധിച്ച അന്തിമ തീരുമാനങ്ങള്ക്കായി സംസ്ഥാനത്ത് ഇന്ന് സര്വ്വകക്ഷി യോഗം ചേരും.
സംസ്ഥാനത്ത് നടപ്പിലാക്കേണ്ട നിയന്ത്രണങ്ങളും കോവിഡ് പ്രതിരോധ പ്രവര്ത്തനങ്ങളും യോഗത്തില് ചര്ച്ച ചെയ്യും. ശനിയും ഞായറും നടപ്പാക്കിയതുപോലുള്ള നിയന്ത്രണം വോട്ടെണ്ണല് വരെയോ അതുകഴിഞ്ഞ് ഒരാഴ്ചകൂടിയോ വേണമെന്ന അഭിപ്രായമുണ്ട്. ഇക്കാര്യം സംബന്ധിച്ച് യോഗത്തില് വിശദമായ ചര്ച്ച ഉണ്ടാകും.
ലോക്ക് ഡൗണ് ഒഴിവാക്കിയുള്ള പ്രതിരോധ നടപടികള്ക്ക് കോണ്ഗ്രസ് പിന്തുണ അറിയിച്ചിട്ടുണ്ട്. നിയന്ത്രണങ്ങള് ഏത് രീതിയില് വേണമെന്നതും പ്രതിരോധ നടപടികള് ഊര്ജിതമാക്കാന് എന്തൊക്കെ ചെയ്യാമെന്നതും ഇന്ന് യോഗത്തില് ചര്ച്ച ചെയ്യും.
