ന്യൂഡല്‍ഹി: കോവിഡ് രോഗികള്‍ക്കായുള്ള ആംബുലന്‍സ് സര്‍വ്വീസുകളുടെ നിരക്ക് ഏകീകരിക്കണമെന്നു സുപ്രീംകോടതി. ആംബുലന്‍സ് സേവനത്തിന് അമിത ഫീസ് ഈടാക്കുന്നുവെന്ന വ്യാപക പരാതിയെ തുടര്‍ന്നാണ് നിര്‍ദേശം.
രോഗികളില്‍നിന്ന് അമിത ഫീസ് ഈടാക്കുന്നതില്‍ സുപ്രീംകോടതി അതൃപ്തി പ്രകടിപ്പിച്ചു. ഇക്കാര്യത്തില്‍ കേന്ദ്ര സംസ്ഥാന സര്‍ക്കാരുകള്‍ നടപടിയെടുക്കണമെന്നും ജില്ലകള്‍ തോറും ആവശ്യത്തിനു ആംബുലന്‍സ് ഉറപ്പാക്കണമെന്നും ജസ്റ്റീസ് അശോക് ഭൂഷണ്‍ അധ്യക്ഷനായ ബെഞ്ച് നിര്‍ദേശിച്ചു. കോവിഡ് രോഗികളെ ആശുപത്രികളിലെത്തിക്കുന്നതിനും തിരികെ കൊണ്ടുപോകുന്നതിനും മതിയായ രീതിയില്‍ ആംബുലന്‍സ് ഇല്ലെന്നു ചൂണ്ടിക്കാട്ടിയുള്ള പൊതുതാത്പര്യ ഹര്‍ജിയാണ് സുപ്രീംകോടതി പരിഗണിച്ചത്.
നേരത്തേ, കോവിഡ് പരിശോധനക്ക് അമിത തുക ഈടാക്കുന്നതിനെതിരെ സുപ്രീംകോടതി ഇടപ്പെട്ടിരുന്നു. തുടര്‍ന്ന് കോവിഡ് പരിശോധനയുടെ ഫീസ് ഏകീകരിക്കണമെന്ന് സുപ്രീംകോടതി ആവശ്യപ്പെടുകയും ചെയ്തു. കൂടാതെ സ്വകാര്യ ആശുപത്രികള്‍ കോവിഡ് ചികിത്സക്ക് ഈടാക്കുന്ന അമിത ഫീസിനും സുപ്രീംകോടതി കടിഞ്ഞാണിട്ടിരുന്നു.
