ന്യൂഡല്ഹി : കോവിഡിന്റെ ബൂസ്റ്റര് ഡോസ് നല്കുന്നതില് പുനരാലോചനയുമായി കേന്ദ്ര സര്ക്കാര്. ബൂസ്റ്റര് ഡോസ് എല്ലാവര്ക്കും ആവശ്യമില്ലെന്നാണ് വിദഗ്ധ ഉപദേശം. വിഷയത്തില് കേന്ദ്രം ലോകാരോഗ്യ സംഘടനയുടെ നിലപാടും തേടിയിട്ടുണ്ട്. ബൂസ്റ്റര് ഡോസ് വാക്സീന് നല്കിയാല് രോഗത്തെ പ്രതിരോധിക്കാന് സാധിക്കുമെന്നതില് തെളിവില്ലെന്ന നിലപാടാണ് കേന്ദ്രത്തിന്. മറ്റ് പലരാജ്യങ്ങളും ഇതിനോടകം ബൂസ്റ്റര് വാക്സീന് നല്കിയിട്ടുണ്ടെങ്കിലും ഒമിക്രോണിനെ പ്രതിരോധിക്കാന് അതിന് സാധിച്ചിട്ടില്ലെന്നതാണ് ചൂണ്ടിക്കാട്ടപ്പെടുന്നത്. അതേ സമയം ആരോഗ്യ പ്രവര്ത്തകര്, കോവിഡ് മുന്നണി പോരാളികള്, 60 വയസ് കഴിഞ്ഞ അനുബന്ധ രോഗമുള്ളവര് എന്നിവര്ക്ക് കരുതല് ഡോസ് നല്കുന്നത് തുടരാമെന്നാണ് കേന്ദ്രം തീരുമാനം എടുത്തിരിക്കുന്നത്.
അതേ സമയം രാജ്യത്ത് പ്രതിദിന കോവിഡ് രോഗികളുടെ എണ്ണത്തില് നേരിയ കുറവുണ്ടായി. 24 മണിക്കൂറില് പ്രതിദിന രോഗികളുടെ എണ്ണം മൂന്ന് ലക്ഷത്തിന് താഴെയാണ്. എങ്കിലും മരണസംഖ്യ തുടര്ച്ചയായി രണ്ടാം ദിവസവും 500 ന് മുകളിലെത്തി. 2,86,384 പേര്ക്കാണ് രോഗം സ്ഥിരീകരിച്ചത്. 573 പേര് മരണമടഞ്ഞു. ടിപിആര് 19.59% ആണെന്ന് ഔദ്യോഗിക കണക്കുകള് പുറത്തുവരുന്നു.
