തിരുവനന്തപുരം : സംസ്ഥാനത്ത് കോവിഡ് കേസുകള് ഉയരുന്നതായി ആരോഗ്യമന്ത്രി വീണാ ജോര്ജ്. ഒരാഴ്ചയ്ക്കുള്ളില് കോവിഡ് കേസുകളില് 100ശതമാനം വര്ധനയുണ്ടായതായും ആരോഗ്യമന്ത്രി പറഞ്ഞു. ആരോഗ്യപ്രവര്ത്തകരിലും കൂടുതല് കേസുകള് റിപ്പോര്ട്ട് ചെയ്യുന്നുണ്ട്. എല്ലാ ജില്ലയിലെ സ്ഥിതിഗതികള് വിലയിരുത്തി ആവശ്യമായി തയ്യാറെടുപ്പുകള് സ്വീകരിച്ചതായും ആരോഗ്യമന്ത്രി പറഞ്ഞു.
എല്ലാ ജില്ലകളിലും കേസുകള് വലിയരീതിയില് വര്ധിക്കുന്നുണ്ട്. തിരുവനന്തപുരം, എറണാകുളം, തൃശൂര് കോഴിക്കോട് എന്നീ ജില്ലകളിലാണ് കൂടുതല് കേസുകള്. എല്ലാവരും വളരെ ജാഗ്രത തുടരണം. കോവിഡ് പ്രോട്ടോകോള് പാലിക്കാതെ ആള്ക്കൂട്ടങ്ങള് ഉണ്ടാകുന്നത് നിര്ഭാഗ്യകരമാണ്. അത് കേസുകള് വര്ധിക്കാനിടയാക്കും. അതുകൊണ്ട് തന്നെ എല്ലാവരും കോവിഡ് പ്രോട്ടോകോള് പാലിക്കണമെന്ന് മന്ത്രി പറഞ്ഞു.
അനാവശ്യമായ യാത്രകള്, ആള്ക്കൂട്ടങ്ങള് എന്നിവ ഒഴിവാക്കണം. കഴിഞ്ഞയാഴ്ചയിലെ കോവിഡ് ബാധിതരുടെ കണക്ക് പരിശോധിച്ചാല് 20നും നാല്പ്പതിനും ഇടയിലുള്ളവരാണ് കൂടുതല് രോഗികള്. ഇതിന് കാരണം സമ്പര്ക്കമാണെന്നും മന്ത്രി പറഞ്ഞു. സംസ്ഥാനത്ത് കോവിഡ് വാക്സിന് ഒരു ഡോസ് സ്വീകരിച്ചവര് 99 ശതമാനാണ്. രണ്ട് ഡോസും സ്വീകരിച്ചത് 82 ശതമാനമാണെന്നും കരുതല് ഡോസ് 60,000ലധികം പേര്ക്ക് നല്കിയതായും ആരോഗ്യമന്ത്രി പറഞ്ഞു
