ന്യൂഡല്ഹി : കോവിഡ് മഹാമാരിയുടെ രണ്ടാം തരംഗം രാജ്യത്തെ വിറപ്പിക്കുന്ന സാഹചര്യത്തില് എല്ലാ പ്രായത്തിലുള്ളവരും ജാഗ്രതയിലാണ്. ആദ്യ വരവില് കോവിഡ് പ്രായമായവരെയാണ് ഏറ്റവും കൂടുതലായി ബാധിച്ചിരുന്നതെങ്കില് രണ്ടാം വരവില് അത് ഏത് പ്രായക്കാരെയും രോഗിയാക്കുന്ന കാഴ്ചയാണ്. മുന്ഗാമിയെ അപേക്ഷിച്ച് വകഭേദം സംഭവിച്ച കോറോണ വൈറസ് കാരണം രോഗബാധിതരുടെ എണ്ണവും മരണനിരക്കും കുത്തനെ കൂടുകയാണ്.
രണ്ടാം തരംഗത്തില് 25 മുതല് 45 വയസിനിടയില് പ്രായമുള്ളവരെയാണ് ഏറ്റവും കൂടുതല് ബാധിക്കുകയെന്നും കുട്ടികളില് രോഗബാധ റിപ്പോര്ട്ട് ചെയ്യുന്നത് വര്ധിച്ചിട്ടുണ്ടെന്നും പ്രശസ്ത ശിശുരോഗ വിദഗ്ധനായ ഡേ. മഹേഷ് ഹിരണന്ദനി പറഞ്ഞു.
ലോകാരോഗ്യ സംഘടനയുടെ കണക്കനുസരിച്ച് മൊത്തം കോവിഡ് കേസുകളില് 8.5 ശതമാനവും 10 വയസിന് താഴെയുള്ള കുട്ടികളാണ്. 300 കോടിയാളുകളെ രോഗം ബാധിക്കുമെന്നാണ് ഏറ്റവും പുതിയ പഠനം സൂചിപ്പിക്കുന്നത്. ആദ്യ തരംഗത്തില് ചുമ, തൊണ്ടവേദന, പനി തുടങ്ങിയ ലക്ഷണങ്ങളുമായായിരുന്നു കുട്ടികള് വന്നത്. എന്നാല് രണ്ടാം തരംഗത്തില് വയറിളക്കം, ചര്ദ്ദി, വയറുവേദന, പനി തുടങ്ങിയ ലക്ഷണങ്ങളാണ് കാണിക്കുന്നത്. കുട്ടികള് രോഗം വീട്ടിലെ മറ്റുള്ളവര്ക്ക് പകര്ന്ന് നല്കാന് സാധ്യതയുണ്ട്. അതിനാല് അവര് എല്ലാ കോവിഡ് ചട്ടങ്ങളും കണിശമായി പാലിക്കേണ്ടതുണ്ട്. മാസ്ക് ധരിക്കാനും സാമൂഹിക അകലം പാലിക്കാനും വിസമ്മതിക്കുന്നതിനാലും റാലികളും മതപരമായ ചടങ്ങുകളും നടത്തുന്നതിനാലുമാണ് രോഗബാധ ഇത്ര കണ്ട് ഉയരുന്നത്. രോഗബാധിതരില് തന്നെ വീണ്ടും രോഗം ബാധിക്കാന് ഇത് ഇടയാക്കും. മാനദണ്ഡങ്ങള് പാലിക്കുന്നുണ്ടെന്നും സൂപ്പര് സ്പ്രെഡര് ആകില്ലെന്നും നാം ഉറപ്പാക്കണമെന്നും ഡേ. മഹേഷ് ഹിരണന്ദനി പറഞ്ഞു.
കോവിഡ് ബാധയുടെ രൂക്ഷത പരിശോധിക്കുമ്പോള് കുട്ടികള്ക്കിടയില് മരണനിരക്ക് കുറവാണെന്ന് പി.ജി.ഐയിലെ പീഡിയാട്രിക് വിഭാഗം തലവനായ പ്രഫ. സുര്ജിത് സിങ് ചൂണ്ടിക്കാണിക്കുന്നു. 10 ദിവസത്തിനിടെ 12 വയസു വരെ പ്രായമുള്ള 8 മുതല്12 വരെ കുട്ടികളെ കോവിഡ് ആശുപത്രിയില് പ്രവേശിപ്പിച്ചതായാണ് കണക്കുകള്. ഈ കുട്ടികളുടെ കൂടെ മാനസിക പിന്തുണ നല്കാനായി രക്ഷിതാക്കളെ പ്രവേശിപ്പിക്കുന്നുണ്ട്.
ഉയര്ന്ന ഓക്സിജനും വെന്റിലേഷനും ആവശ്യമുള്ള കുട്ടികള്ക്ക് സ്റ്റിറോയ്ഡുകള്, റെംഡെസിവിര്, ടോസിലിസുമാബ്, ഇമ്മ്യൂണോഗ്ലോബുലിന് എന്നിവ ഡോസ് അഡ്ജസ്റ്റ്മെന്റുകള് അനുസരിച്ച് നല്കുന്നു. കുട്ടികളില് രോഗമുക്തിനിരക്ക് മികച്ചതാണെന്നും ഡോക്ടര്മാര് സാക്ഷ്യപ്പെടുത്തുന്നു. രാജ്യത്ത് പ്രതിദിന കോവിഡ് കേസുകളുടെ എണ്ണം 2.73 ലക്ഷം കടന്ന് കുതിക്കുകയാണ്. രാജ്യത്ത് ഇതുവരെ കോവിഡ് ബാധിച്ചവരുടെ എണ്ണം 1.5 കോടിയായി ഉയര്ന്നു.
