പെരിന്തല്മണ്ണ: സംസ്ഥാനത്ത് കോവിഡ് ബാധിച്ച് ചികിത്സയിലായിരുന്ന ഒരാള് കൂടി മരിച്ചു. പെരിന്തല്മണ്ണ സ്വദേശി മൊയ്ദൂപ്പയാണ് (82) കോവിഡ് ബാധിച്ച് മരിച്ചത്. സമ്പര്ക്കത്തിലൂടെയാണ് ഇയാള് രോഗബാധിതനായത്. ഇതോടെ ജില്ലയില് കോവിഡ് ബാധിതരായി മരണമടഞ്ഞവരുടെ എണ്ണം 20 ആയി.
പനിയും ശ്വാസതടസ്സവും അനുഭവപ്പെട്ടതിനെ തുടര്ന്ന് ജൂലൈ 30നാണ് മൊയ്ദൂപ്പയെ മഞ്ചേരി മെഡിക്കല് കോളജില് പ്രവേശിപ്പിക്കുന്നത്. സ്രവ പരിശോധനയില് കോവിഡ് സ്ഥിരീകരിച്ചതോടെ കോവിഡ് ഐസിയുവിലേക്ക് മാറ്റി. പരിശോധനയില് ന്യൂമോണിയ, ശരീരത്തിലെ പ്രധാനപ്പെട്ട അവയവങ്ങള് പ്രവര്ത്തന രഹിതമാവുന്ന മള്ട്ടി ഓര്ഗന് ഡിസ്ഫങ്ഷന് എന്നിവ കണ്ടെത്തിയിരുന്നു. ആരോഗ്യ സ്ഥിതി വഷളായതിനെ തുടര്ന്ന് മെഡിക്കല് ബോര്ഡിന്റെ നിര്ദ്ദേശ പ്രകാരം പ്ലാസ്മ തെറാപ്പി, ഇഞ്ചക്ഷന് ടോസിലിസുമാബ് എന്നിവ നല്കിയിരുന്നു.
രോഗിയുടെ നില വീണ്ടും വഷളായതോടെ വെന്റിലേറ്ററിലേക്ക് മാറ്റിയെങ്കിലും ചൊവ്വാഴ്ച രാവിലെ മരിക്കുകയായിരുന്നു.
