തിരുവനന്തപുരം: ജില്ലയില്‍ ഓഗസ്റ്റിലെ കൊവിഡ് മരണനിരക്ക് സംസ്ഥാനത്തെ മരണ നിരക്കിനെക്കാളും മുകളില്‍. നിലവില്‍ 0.71ശതമാനമാണ് തിരുവനന്തപുരം ജില്ലയിലെ കൊവിഡ് മരണനിരക്ക്. സംസ്ഥാനത്താകട്ടെ മരണനിരക്ക് 0.43 ശതമാനമാണ്. ഓഗസ്റ്റിലെ ആദ്യ ആഴ്ചയില്‍ ജില്ലയിലെ മരണനിരക്ക് സംസ്ഥാനത്തെ ആകെ മരണ നിരക്കിനെക്കാള്‍ 0.3 ശതമാനം ഉയര്‍ന്നിരുന്നു. കണ്ണൂര്‍, കോഴിക്കോട് ജില്ലകളിലും മരണനിരക്ക് സംസ്ഥാന നിരക്കിനെക്കാള്‍ മുകളിലാണ്.
കഴിഞ്ഞ ഒരു മാസത്തിനിടെ ജില്ലയിലുണ്ടായത് നൂറിലേറെ മരണങ്ങളാണ്. കഴിഞ്ഞ 22 ദിവസത്തിനിടെ മാത്രം 46 മരണങ്ങളാണ് നടന്നത്. ആകെ 129 മരണങ്ങളാണ് ജില്ലയില്‍ കൊവിഡ് മൂലം ഉണ്ടായത്. ജില്ലയില്‍ കൊവിഡ് ബാധിച്ച്‌ മരിച്ച ഏറ്റവും പ്രായം കുറഞ്ഞയാള്‍ 21 വയസുള്ള ബാലരാമപുരം സ്വദേശിയാണ്. സമ്പര്‍ക്ക രോഗവ്യാപനം കുറയാതെ നില്‍ക്കുമ്പോള്‍ മരണനിരക്ക് ഉയര്‍ന്നത് ആശങ്കയുണ്ടാക്കുന്നുണ്ട്.
