കോഴഞ്ചേരി: കോവിഡ് ബാധിതയായി യുവതിയെ ഫോണിൽ വിളിച്ച് അസഭ്യം പറഞ്ഞയാളെ നിസ്സാര കുറ്റം ചുമത്തി സ്റ്റേഷൻ ജാമ്യത്തിൽ ഇയാളെ വിട്ടയച്ച സംഭവത്തിൽ പോലീസ് ഒത്തു കളിക്കുകയാണെന്ന ആരോപണം ശക്തമാകുന്നു. പൂവത്തൂർ സ്വദേശി രാഹുൽ ആർ.നായരെയാണ് കഴിഞ്ഞ ദിവസം കോയിപ്രം പോലീസ് അറസ്റ്റ് ചെയ്ത് വിട്ടയച്ചത്.
കുറ്റക്കാരൻ ഡി.വൈ.എഫ്.ഐ. നേതാവായതിനാൽ രക്ഷിക്കാൻ രാഷ്ട്രീയ ഇടപെടലുകൾ നടന്നതായും ആക്ഷേപം ഉയരുന്നുണ്ട്. പരാതിക്കാരിയോട് പരാതി പിൻവലിക്കാൻ ചിലർ ആവശ്യപ്പെട്ടു. ഇതോടെ പരാതിയില്ലെന്ന് കാട്ടി കേസ് തീർപ്പാക്കാനായിരുന്നു ആദ്യ ശ്രമം. എന്നാൽ, കേസെടുക്കാതെ പറ്റില്ലെന്ന നിലപാടിൽ പരാതിക്കാരി എത്തിയതോടെയാണ് പേരിനൊരു കേസ് എന്ന നടപടിയിലേക്ക് പോലീസും കടന്നത്.
സെപ്റ്റംബർ രണ്ടിന് ജില്ലാ പോലീസ് മേധാവിക്കും യുവതി പരാതി നൽകിയിരുന്നു. രാഹുൽ എന്ന ആൾ വാട്സ് ആപ്പിലും ഫോണിലും അസഭ്യം പറഞ്ഞതായിരുന്നു പരാതി. പരാതി കൊടുത്ത യുവതിക്ക് കോവിഡ് വന്നത് നന്നായെന്ന അർത്ഥത്തിൽ ഫോണിൽ സംസാരം തുടങ്ങിയശേഷം രാഹുൽ അസഭ്യവാക്കുകൾക്കൊണ്ട് സ്ത്രീയെ അവഹേളിക്കുകയായിരുന്നു. ഇയാളുടെ ഫോൺ സംഭാഷണം സമൂഹ മാധ്യമത്തിൽ പ്രചരിക്കുകയാണ്. വരും ദിവസങ്ങളിൽ ഉന്നതാധികാരികൾ ക്ക് പരാതി നൽകാനാണ് യുവതിയുടെ തീരുമാനം.