തിരുവനന്തപുരം : വ്യാഴം, വെള്ളി ദിവസങ്ങളില് സംസ്ഥാനത്ത് കോവിഡ് കൂട്ടപരിശോധന. കോവിഡ് പ്രതിരോധം ശക്തിപ്പെടുത്തുന്നതിനുള്ള വര്ധിപ്പിച്ച ടെസ്റ്റിംഗ് സ്ട്രാറ്റജിയുടെ ഭാഗമായാണ് കൂട്ടപ്പരിശോധന. വ്യാഴം, വെള്ളി ദിവസങ്ങളിലായി 3.75 ലക്ഷം പേരുടെ പരിശോധന നടത്താനാണ് ആരോഗ്യവകുപ്പ് ലക്ഷ്യമിടുന്നത്. തുടര്ച്ചയായി രോഗബാധ നിലനില്ക്കുന്ന പ്രത്യേക സ്ഥലങ്ങളും പ്രത്യേക വിഭാഗങ്ങളും കണ്ടെത്തി വ്യാഴാഴ്ച 1.25 ലക്ഷം പേരെയും വെള്ളിയാഴ്ച 2.5 ലക്ഷം പേരെയും പരിശോധിക്കും. കോവിഡ് മുക്തരായവരെ പരിശോധനയില് നിന്നും ഒഴിവാക്കിയിട്ടുണ്ട്.
ജനക്കൂട്ടവുമായി ഇടപെടല് നടത്തുന്ന 45 വയസിന് താഴെ പ്രായമുള്ളവര്, വാക്സിനെടുക്കാത്ത 45 വയസിന് മുകളില് പ്രായ മുള്ളവര്, കോവിഡ് ബാധിതരുമായി സമ്പര്ക്കമുള്ളവര്, കോവിഡ് ലക്ഷണമുള്ള ആള്ക്കാര്, ഗുരുതര ശ്വാസകോശ അണുബാധയുള്ളവര്, കോവിഡ് രോഗ ലക്ഷണങ്ങളില്ലെങ്കിലും പ്രമേഹം, രക്തസമ്മര്ദം തുടങ്ങിയ ഗുരുതര രോഗങ്ങളുള്ളവര്, ഒ.പി യിലെ എല്ലാ രോഗികളും, കോവിഡിതര രോഗങ്ങള്ക്ക് ചികിത്സ തേടുന്ന രോഗികള് തുടങ്ങിയവരെ കോവിഡ് പരിശോധനയ്ക്ക് വിധേയരാക്കും.
