ദുബായ് : കൊവിഡിന്റെ പുതിയ വകഭേദമായ ഒമിക്രോണ് സൗദിയിലും യുഎഇയിലും സ്ഥിരീകരിച്ചു. യുഎഇയില്എത്തിയ ആഫ്രിക്കന് വനിതയിലാണ് വൈറസ് ബാധ സ്ഥിരീകരിച്ചത്. ഇവരെ നിരീക്ഷണത്തില് പ്രവേശിപ്പിച്ചു. ഒമിക്രോണ് സ്ഥിരീകരിച്ച സ്ത്രീയുമായി സമ്പര്ക്കം പുലര്ത്തിയവരെയും നിരീക്ഷണത്തില് പ്രവേശിപ്പിക്കാനുള്ള നടപടികള് ആരംഭിച്ചതായി അധികൃതര് അറിയിച്ചു.
ഏത് സാഹചര്യവും നേരിടാന് ആരോഗ്യരംഗം തയ്യാറാണെന്നും ബൂസ്റ്റര് ഡോസ് ഉള്പ്പെടെ എല്ലാവരും വാക്സിനെടുക്കണമെന്നും ആരോഗ്യ, രോഗപ്രതിരോധ മന്ത്രാലയം വ്യക്തമാക്കി. സൗദി അറേബ്യയില് ആഫ്രിക്കയില് നിന്നെത്തിയ സൗദി പൗരനിലാണ് രോഗബാധ സ്ഥിരീകരിച്ചത്. രോഗം സ്ഥിരീകരിച്ച വ്യക്തിയെയും ഇയാളുമായി സമ്പര്ക്കം പുലര്ത്തിയവരെയും ക്വാറന്റീന് ചെയ്തു.
ഒമിക്രോണ് വ്യാപനത്തിന്റെ പശ്ചാത്തലത്തില് പതിനാല് ആഫ്രിക്കന് രാജ്യങ്ങള്ക്ക് സൗദി യാത്രാവിലക്ക് ഏര്പ്പെടുത്തിയിരുന്നു. വിലക്ക് ഏര്പ്പെടുത്തുന്നതിന് മുന്പ് സൗദിയില് എത്തിയതാവാം ഒമിക്രോണ് സ്ഥിരീകരിച്ച വ്യക്തിയെന്നാണ് സൂചന. ഒമിക്രോണ് സ്ഥിരീകരിച്ച സാഹചര്യത്തില് ജനങ്ങള് ആശങ്കപ്പെടേണ്ടതില്ലെന്നും ഏത് അവസ്ഥയെയും നേരിടാന് ആരോഗ്യവകുപ്പ് സജ്ജമാണെന്നും അധികൃതര് അറിയിച്ചു. എല്ലാവരും വാക്സിനേഷന് പൂര്ത്തിയാക്കണമെന്നും പ്രതിരോധപ്രവര്ത്തനങ്ങളില് പങ്കാളികളാവണമെന്നും മന്ത്രാലയം ആവശ്യപ്പെട്ടു.
