ഡല്ഹി: രാജ്യ തലസ്ഥാനത്ത് കോവിഡ് ഉയരുന്നു. ഡല്ഹിയില് തിങ്കളാഴ്ച 293 പുതിയ കോവിഡ് കേസുകളാണ് റിപ്പോര്ട്ട് ചെയ്തത്. പോസിറ്റിവിറ്റി നിരക്ക് 18.53 ശതമാനമായി ഉയര്ന്നു. പരിശോധിച്ചവരില് അഞ്ചില് ഒരാള് പോസിറ്റീവ് ആണെന്ന് ആരോഗ്യ വകുപ്പ് പുറത്തുവിട്ട കണക്കുകള് വ്യക്തമാക്കുന്നു. ഇതിനിടെ രണ്ട് കോവിഡ് മരണങ്ങളും റിപ്പോര്ട്ട് ചെയ്തു. കഴിഞ്ഞ ആഴ്ചയിലെ അപേക്ഷിച്ച് കണക്കുകള് ഉയരുകയാണ്. തലസ്ഥാനത്തെ കോവിഡ് കേസുകളുടെ വര്ധന സര്ക്കാര് നിരീക്ഷിക്കുകയാണെന്നും ഏതു സാഹചര്യവും നേരിടാന് തയാറാണെന്നും ഡല്ഹി മുഖ്യമന്ത്രി അരവിന്ദ് കേജ്രിവാള് പറഞ്ഞു.
അതേസമയം രാജ്യത്ത് 3,038 പേര്ക്ക് പുതിയതായി കോവിഡ് സ്ഥിരീകരിച്ചു. ഇതോടെ നിലവില് കോവിഡ് ബാധിച്ച് ചികിത്സയിലുള്ളവരുടെ എണ്ണം 21,179 ആയതായി കേന്ദ്ര ആരോഗ്യമന്ത്രി അറിയിച്ചു. ഒന്പതു മരണം കൂടി റിപ്പോര്ട്ട് ചെയ്തതോടെ കോവിഡ് ബാധിച്ച് രാജ്യത്ത് മരിച്ചവരുടെ എണ്ണം 5,30,901 ആയി.
