തിരുവനന്തപുരം: ആശുപത്രിയിലേക്ക് മാറ്റുന്നതിനിടെ കൊവിഡ് രോഗി രക്ഷപ്പെടാന്‍ ശ്രമിച്ചു. ശനിയാഴ്ച്ച കൊവിഡ് സ്ഥിരീകരിച്ച തിരുവനന്തപുരം പാലോട് സ്വദേശിയാണ് ചികില്‍സക്ക് തയ്യാറാകാതെ രക്ഷപ്പെടാന്‍ ശ്രമിച്ചത്. കൊവിഡ് സ്ഥിരീകരിച്ചതിനെ തുടര്‍ന്ന് ഇയാളെ ആശുപത്രിയിലേക്ക് മാറ്റാനായി ആരോഗ്യപ്രവര്‍ത്തകര്‍ എത്തിയെങ്കിലും ഇയാള്‍ സഹകരിച്ചില്ല. ഇതോടെ ആരോഗ്യപ്രവര്‍ത്തകര്‍ പോലിസിന്റെ സഹായം തേടി. സ്ഥലത്ത് എത്തിയ പാലോട് പോലീസ് കൊവിഡ് രോഗിയെ ആംബുലന്‍സിലേക്ക് കയറ്റാന്‍ ശ്രമിക്കുന്നതിനിടെ ഇയാള്‍ കടന്നു കളയാന്‍ ശ്രമിക്കുകയായിരുന്നു.
ഇതോടെ സ്ഥലത്തുണ്ടായിരുന്ന പോലിസും ഫയര്‍ ഫോഴ്സ് ഉദ്യോഗസ്ഥരും ചേര്‍ന്ന് ഇയാളെ പിടികൂടി ആശുപത്രിയില്‍ എത്തിക്കുകയായിരുന്നു. ബലപ്രയോഗത്തിനിടെ കൊവിഡ് രോഗിയുമായി സമ്പര്‍ക്കത്തില്‍ വന്നതിനാല്‍ പാലോട് സിഐ അടക്കം നാല് പോലിസുകാര്‍ നിരീക്ഷണത്തില്‍ പ്രവേശിച്ചിരിക്കുകയാണ്. പനിയെ തുടര്‍ന്ന് ജൂലൈ 28-ന് ചികില്‍സ തേടിയ ഇയാളെ കൊവിഡ് പരിശോധനയ്ക്ക് വിധേയനാക്കിയിരുന്നു. ശനിയാഴ്ച്ചയാണ് ഇയാളുടെ പരിശോധന ഫലം വന്നത്.
