കൊച്ചി: രോഗവ്യാപനം രൂക്ഷമായതോടെ കൊച്ചി നഗരസഭയുടെ പശ്ചിമ കൊച്ചി മേഖലയില് വരുന്ന 28 ഡിവിഷനുകളില് പോലീസ് ഇന്നു മുതല് നിയന്ത്രണം കൂടുതല് കര്ശനമാക്കും. ആലപ്പുഴ, തൃശൂര് ജില്ലകളിലെ ക്ലസ്റ്ററുകളില് രോഗവ്യാപനം തുടരുന്നത് ആശങ്ക കൂട്ടിയിട്ടുണ്ട്.
എറണാകുളം ജില്ലയില് പശ്ചിമ കൊച്ചി മേഖലയില് രോഗവ്യാപനം രൂക്ഷമെന്ന് മുഖ്യമന്ത്രിയും പറഞ്ഞതോടെയാണ് ഫോര്ട്ട്കൊച്ചി, പള്ളുരുത്തി, മട്ടാഞ്ചേരി, കുമ്പളങ്ങി തുടങ്ങിയ മേഖലകളില് നിയന്ത്രണങ്ങള് കര്ശനമാക്കാന് പോലീസ് തീരുമാനിച്ചത്. മുന്നറിയിപ്പില്ലാതെ ഇന്നലെ ഇവിടെ ലോക്ക്ഡൗണ് ഏര്പ്പെടുത്തിയത് അശയക്കുഴപ്പത്തിന് ഇടയാക്കിയിരുന്നു.
നിയന്ത്രിത മേഖലയിലേക്കുള്ള പ്രവേശനം പോലീസ് പരിശോധനക്ക് ശേഷമായിരിക്കും. ഇന്നലെ 16 പേര്ക്ക് കൂടി രോഗം സ്ഥിരീകരിച്ചതോടെ ഈ ക്ലസ്റ്ററിലെ രോഗികളുടെ എണ്ണം 116 ആയി. ആലുവ ക്ലസ്റ്ററില് പുതിയതായി 15 പേര്ക്ക് രോഗം സ്ഥിരീകരിച്ചതില് 12 പേരും ചൂര്ണ്ണിക്കര സ്വദേശികളാണ്. കോതമംഗലം നെല്ലിക്കുഴിയില് 10 പേര്ക്കും പറവൂര് കോട്ടുവള്ളി മേഖലയില് 5 പേര്ക്കും കൊവിഡ് ബാധിച്ചു. മൂന്ന് ആരോഗ്യ പ്രവര്ത്തകര്ക്കും രോഗ ബാധയുണ്ടായി.
ജില്ലയില് ഒന്പതു പഞ്ചായത്തുകളിലെ പതിനൊന്നു വാര്ഡുകള് പുതിയതായി കണ്ടെയ്ന്മെന്റ് സോണാക്കി. പതിനൊന്നു പഞ്ചായത്തുകളിലെ മുപ്പത്തി മൂന്നു വാര്ഡുകള് കണ്ടെയ്ന്മെന്റ് സോണില് നിന്നും ഒഴിവാക്കി. ആലുവ നഗരസഭ, ചെല്ലാനം പഞ്ചായത്ത് എന്നിവിടങ്ങളിലെ ചില വാര്ഡുകളും ഇതിലുള്പ്പെടും.
