ബാംഗ്ലൂര് : തെരഞ്ഞെടുപ്പ് സമയത്ത് കേരളത്തിലേക്ക് വരുന്നവര്ക്ക് കൊവിഡ് നിബന്ധനകളില് ഇളവു നല്കണമെന്ന ആവശ്യം ശക്തമാകുന്നു. ബാംഗ്ലൂരിലെയും ചെന്നെയിലെയും വിവിധ മലയാളി സംഘടനകള് ഇത് സംബന്ധിച്ച് മുഖ്യമന്ത്രിക്ക് നിവേദനം നല്കി. ചെന്നൈയിലും ബാംഗ്ലൂരിലുമായി 20 ലക്ഷത്തോളം മലയാളികളുണ്ട്. ഇവരില് വലിയൊരു വിഭാഗം തദ്ദേശ തെരഞ്ഞെടുപ്പില് വോട്ടു ചെയ്യാന് കേരളത്തിലെത്തും. എന്നാല് നിര്ബന്ധിത ക്വാറന്റീന് അടക്കം സംസ്ഥാനത്ത് നിലവിലുള്ള കൊവിഡ് നിബന്ധനകള് ഇത്തരത്തില് നാട്ടിലെത്തുന്നവര്ക്ക് വെല്ലുവിളിയാണ്.
രാജ്യത്ത് കേരളത്തില് മാത്രമാണ് മറ്റ് സംസ്ഥാനങ്ങളില്നിന്ന് വരുന്നവര്ക്ക് 7 ദിവസം നിര്ബന്ധിത ക്വാറന്റീനും മറ്റ് നിയന്ത്രണങ്ങളുമുള്ളത്. ഒരാഴ്ച്ചയ്ക്കുള്ളില് വന്ന് മടങ്ങുന്നവര്ക്ക് അടിയന്തിര ആവശ്യത്തിന് രജിസ്റ്റര് ചെയ്ത് വരാമെങ്കിലും കൊവിഡ് നിബന്ധനകള് സംബന്ധിച്ച സംശയം നിലനില്ക്കുന്നുണ്ട്. വോട്ടു ചെയ്യാന് നാട്ടിലെത്തുന്നവര്ക്കായി കൊവിഡ് ജഗ്രതാ പോര്ട്ടലില് പ്രത്യേക ഓപ്ഷന് ക്രമീകരിക്കണമെന്ന ആവശ്യവും ശക്തമാണ്. നിയന്ത്രണങ്ങള് നീക്കുന്ന കാര്യം പരിഗണിക്കുമെന്നാണ് അധികൃതര് അറിയിച്ചത്.
