തിരുവനന്തപുരം : ഡിസംബര് 26ന് ശേഷം മകരവിളക്ക് ഉത്സവ കാലത്ത് ശബരിമല ദര്ശനത്തിനെത്തുന്ന അയ്യപ്പഭക്തര്ക്ക് കോവിഡ് 19 ആര്ടിപിസിആര് നെഗറ്റീവ് സര്ട്ടിഫിക്കറ്റ് നിര്ബന്ധമാണെന്ന് തിരുവിതാംകൂര് ദേവസ്വം ബോര്ഡ് പ്രസിഡന്റ് അഡ്വ.എന്.വാസു വ്യക്തമാക്കി. 48 മണിക്കൂറിനുള്ളില് എടുത്ത ആര്ടിപിസിആര് നെഗറ്റീവ് സര്ട്ടിഫിക്കറ്റാണ് ശബരിമല ദര്ശനത്തിനായി എത്തുമ്പോള് അയ്യപ്പഭക്തര് കൈയ്യില് കരുതേണ്ടത്.
ഡിസംബര് 31 മുതല് 2021 ജനുവരി 19 വരെയാണ് മകരവിളക്ക് ഉത്സവകാലം. ആര്ടിപിസിആര് പരിശോധന നെഗറ്റീവ് സര്ട്ടിഫിക്കറ്റ് ഇല്ലാതെ വരുന്ന ഭക്തര്ക്ക് മല കയറാന് അനുമതി ലഭിക്കുകയില്ലെന്നും ദേവസ്വം ബോര്ഡ് പ്രസിഡന്റ് അറിയിച്ചു. കോവിഡ് പശ്ചാത്തലത്തില് പോലും ദേവസ്വം ബോര്ഡിന്റെ സാമ്പത്തിക ബുദ്ധിമുട്ട് കണക്കിലെടുത്ത് ഈ ശബരിമല തീര്ത്ഥാടന സമയത്ത് സര്ക്കാര് 20 കോടി രൂപ ദേവസ്വം ബോര്ഡിന് നല്കിയെന്നും പ്രസിഡന്റ് പറഞ്ഞു.
