റഷ്യ : കൊറോണ വൈറസ് മൂലം നട്ടംതിരിഞ്ഞ ലോകത്തിന് റഷ്യയില് നിന്നും ഒരു സന്തോഷ വാര്ത്ത. റഷ്യയില് കൊറോണ വൈറസിനെതിരെ വിശ്വസനീയമായ വാക്സിന് പരീക്ഷണം പൂര്ത്തിയായതായി റഷ്യന് ആരോഗ്യമന്ത്രിയാണ് അറിയിച്ചത്. ആദ്യ കൊവിഡ് വാക്സിന് നാളെ രജിസ്റ്റര് ചെയ്യും. ഗമലയ ഇന്സ്റ്റിറ്റ്യൂട്ട് വികസിപ്പിച്ചെടുത്ത അതെ വാക്സിന് തന്നെയാണ് ഇത്. ഇതിനൊപ്പം രണ്ട് കമ്പിനികള്കൂടി ക്ലിനിക്കല് പരീക്ഷണങ്ങള് നടത്താന് അനുമതി തേടിയിട്ടുണ്ട്.
വാക്സിന് എപ്പോള് വിപണിയിലെത്തിക്കും എന്നത് ഗവേഷകരുടെ തീരുമാനത്തെ ആശ്രയിച്ചിരിക്കുമെന്നും അദ്ദേഹം പറഞ്ഞു. വാക്സിന്റെ ക്ലിനിക്കല് പരീക്ഷണത്തില് പങ്കാളികളായ വ്യക്തികളുടെ അവസാന ആരോഗ്യ പരിശോധന ഓഗസ്റ്റ് 3ന് നടന്നിരുന്നു. ബുര്ദെന്കോ മെയിന് മിലിറ്ററി ക്ലിനിക്കല് ആശുപത്രിയിലായിരുന്നു പരിശോധന. പരിശോധനയില് വാക്സിന് ലഭിച്ചവര്ക്കെല്ലാം കൊവിഡിനെതിരായ പ്രതിരോധം ലഭിച്ചുവെന്ന് വ്യക്തമായി. വാക്സിന് മറ്റ് പാര്ശ്വ ഫലങ്ങളില്ലെന്നും തെളിഞ്ഞു.
എന്നാല് ലോകാരോഗ്യ സംഘടനയുടെ റിപ്പോര്ട്ട് പ്രകാരം അതിസങ്കീര്ണമായ ഫേസ് 3 പരീക്ഷണഘട്ടത്തിലെത്തിയ ആറ് വാക്സിനുകളില് റഷ്യന് വാക്സിന് ഇടംനേടിയിട്ടില്ല. ഈ ആറ് വാക്സിനുകളില് മൂന്നെണ്ണം ചൈനയില് നിന്നും ഒരെണ്ണം ഓക്സ്ഫോര്ഡ് സര്വകലാശാല വികസിപ്പിച്ചതും ഒന്ന് ആസ്ട്രസെനേക്ക, മോഡേണ എന്നിവര് വികസിപ്പിച്ചതും, ഒന്ന് ബയോടെക്ക്, ഫിഷര് എന്നിവര് സംയുക്തമായി വികസിപ്പിച്ചതുമാണ്.
